Ministrja në detyrë e Drejtësisë, Albulena Haxhiu, ka kërkuar që Millan Radojiçiq dhe “44 paramilitarët e tij” të gjykohen në Kosovë për sulmin terrorist në Banjskë, me ose pa ekstradim.
Pas ndryshimeve të fundit në Kodin e Procedurës Penale, të cilat lejojnë gjykimin në mungesë edhe për vepra penale të natyrës së rëndë, Haxhiu ka theksuar se këto ndryshime mund të zbatohen edhe për sulmin terrorist në Banjskë.
“Pavarësisht kësaj mundësie ligjore, s’ka dyshim që vlera e dobia janë të shumëfishta kur kryeterroristi Millan Radojiçiq dhe 44 paramilitarët e tij, të dorëzohen në Republikën e Kosovës dhe të përballen drejtpërdrejt me drejtësinë”, ka deklaruar Haxhiu.
Ministrja në detyrë ka thënë se Radojiçiq është drejtues de facto i Listës Serbe, duke përmendur se “kjo u bë edhe më e qartë kur kryetari formal i saj, Zlatan Elek, u radhit si i shtati me numrin e votave në zgjedhjet e 9 shkurtit dhe, pas marrjes së mandatit të deputetit, e detyruan të jap dorëheqje”.
Postimi i plotë:
Pas ndryshimeve të fundit në Kodin e Procedurës Penale, është mundësuar aplikimi i gjykimit në mungesë edhe në rastet e veprave penale të natyrës së rëndë. Këto ndryshime mund të aplikohen edhe për sulmin terrorist në Banjskë. Pavarësisht kësaj mundësie ligjore, s’ka dyshim që vlera e dobia janë të shumëfishta kur kryeterroristi Millan Radojiçiq dhe 44 paramilitarët e tij, të dorëzohen në Republikën e Kosovës dhe të përballen drejtpërdrejt me drejtësinë.
Millan Radojiçiq është kryetar de facto i Listës Serbe. Kjo u bë edhe më e qartë kur kryetari formal i saj, Zlatan Elek, u radhit si i shtati me numrin e votave në zgjedhjet e 9 shkurtit dhe, pas marrjes së mandatit të deputetit, e detyruan të jap dorëheqje. Çertifikimi i Listës Serbe për zgjedhjet e fundit ka qenë një gabim i rëndë dhe i pafalshëm.
Saktësisht dy vite më parë, më 22 prill 2023, në paradën e Ushtrisë së Serbisë në Batajnicë, krahas Millan Radojiçiqit ishin të pranishëm edhe dy deputetët e Listës Serbe, Igor dhe Slavko Simiq, si dhe kryetarët Dalibor Jevtiq dhe Goran Rakiq. Atë ditë po ekspozohej edhe sistemi kinez FK-3, pikërisht në vendin ku janë ekshumuar 744 shqiptarë nga varreza masive. Këto fakte dëshmojnë përfshirjen e drejtpërdrejtë dhe bashkëpunimin e strukturave të Listës Serbe në sulmet terroriste dhe kundër rendit kushtetues në Kosovë.
Millan Radoiçiq & Co. duhen gjykuar në Kosovë me ose pa ekstradim, sa më parë.
