Festivali i Këngës në RTSH, prej nga përzgjidhet kënga përfaqësuese për në Eurosong, i ka fillesat e veta në vitin 1962.
Në arkivin e ATSH-së gjenden foto të edicionit të parë të këtij festivali, një prej ngjarjeve më të rëndësishme muzikore në Shqipëri.
Ky ishte edicioni i parë i festivalit organizuar nga Radio Tirana, në një kohë kur vendi ishte nën ndikimin e sistemit socialist dhe arti drejtohej nga parimet e realizmit socialist.
Festivali u zhvillua me një skenografi të thjeshte, dhe u transmetua kryesisht përmes radios.
Edhe në arkivin e ATSH, fotografitë etiketohen “Festivali i Këngës në Radio”.
Këngët trajtonin tema të jetës së përditshme, punës dhe dashurisë për atdheun, duke reflektuar frymën ideologjike të kohës.
Fitues i këtij edicioni të parë ishte Vaçe Zela me këngën “Fëmija i parë”, e cila u bë menjëherë shumë e njohur dhe mbetet një nga këngët më të dashura në historinë e muzikës shqiptare. /atsh
