Qendra për Informim, Kritikë dhe Aksion [QIKA] ka zhvilluar një aksion sot në objektin e Klan Kosovës.
QIKA ka hedhur tym të zi në objektin e televizionit, si aksion kundër asaj që ndodhi mbrëmë në Big Brother VIP Kosova, duke kundërshtuar hyrjen e banorit të ri, Atilla Kardesh, ish-bashkëshorti i banores tjetër të kësaj shtëpie, Drenusha Latifi, e cila e akuzon për dhunë fizike.
“Nuk mund ta normalizoni dhunën ndaj grave!”, shkroi QIKA pas aksionit.
Sipas RRGK-së, ajo që ka ndodhur mbrëmë në një shou në Klan Kosova është e papranueshme dhe bie ndesh me përpjekjet tona të përbashkëta për të luftuar dhunën me bazë gjinore, një fenomen i përhapur që cenon mirëqenien e grave dhe vajzave në shoqërinë tonë.
“Të promovosh figura të përfshira në raste të tilla nuk është vetëm e papërgjegjshme, por dërgon një mesazh të rrezikshëm se dhuna ndaj grave mund të tolerohet apo të minimizohet”.
“Bëjmë thirrje që mediat të marrin përgjegjësinë për të reflektuar seriozitetin që e ka ky problem dhe të jenë pjesë e zgjidhjes, jo e problemit. Dhuna me bazë gjinore duhet të dënohet pa asnjë hezitim dhe duhet të luftohet me vendosmëri nga të gjithë, në çdo mënyrë që munden – për një shoqëri më të drejtë dhe të sigurt për të gjithë”, thuhet në reagim.
