Në Institutin Albanologjik, në Prishtinë, u mbajt tryeza shkencore me titull “Ibrahim Rugova, mendimtari dhe prijësi”, një aktivitet që mblodhi studiues, profesorë dhe personalitete të jetës akademike për të reflektuar mbi figurën dhe trashëgiminë e Ibrahim Rugovës.
Ngjarja u hap me fjalë përshëndetëse, duke vënë në pah rëndësinë e Rugovës si një figurë kyçe në historinë moderne të Kosovës, jo vetëm si prijës politik, por edhe si mendimtar dhe kritik letrar.
Seanca e parë solli një qasje të shumëanshme mbi veprën dhe vizionin e tij. Studiuesit trajtuan rrugëtimin e Rugovës nga fillimet e tij modeste deri në përfaqësimin në skenën ndërkombëtare, duke ndalur te dimensioni i tij teorik në kritikën letrare dhe arti i leximit si pjesë e identitetit të tij intelektual. Një vëmendje e veçantë iu kushtua edhe programit të tij nacional-kulturor dhe vizionit për zgjidhjen e çështjes shqiptare, duke e vendosur Rugovën në një kontekst më të gjerë historik e kulturor.
Pas një pauze të shkurtër, seanca e dytë u përqendrua në figurën e Rugovës si intelektual publik dhe lider me vizion të qartë paqësor. Referuesit theksuan dimensionin e tij si pacifist, rolin e tij në ndërtimin e një paradigme të re të intelektualit në hapësirën shqiptare, si dhe kontributin e tij në letërsi dhe mendimin kritik. Diskutimet sollën interpretime të ndryshme mbi mënyrën se si Rugova ndërtoi një model unik të udhëheqjes, duke ndërthurur kulturën, politikën dhe komunikimin publik, raporton rtk.
Tryeza u përmbyll me diskutime të hapura, ku u nënvizua nevoja për studime të mëtejshme mbi veprën dhe filozofinë e Rugovës, si dhe rëndësia e ruajtjes dhe promovimit të trashëgimisë së tij në brezat e ardhshëm. Ky aktivitet dëshmoi edhe një herë se figura e Rugovës mbetet një pikë referimi e rëndësishme në mendimin kulturor dhe politik shqiptar.
