Ish-komandanti i UÇK-së në Rahovec, Ismet Tara, ka nisur dëshminë në rastin më të madh në Dhomat e Specializuara të Kosovës në Hagë, ku po gjykohen ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi.
Dëshmitari i cili gjatë luftës kishte nofkën “Komandant Hoxha”, është i 123-ti në listën e dëshmitarëve të Zyrës së Prokurorit të Specializuar (ZPS). Ai po merret në pyetje nga Prokurorja Vega Iodice.
Pasi bëri betimin, dëshmitari ka thënë se dëshiron të shpreh shqetësimet e tij lidhur me parregullsitë në këtë gjykatë. “Dua të shpreh shqetësimet e mija në bazë të asaj që kam gjetur parregullsi në këtë gjykatë pastaj të flas”, ka thënë ai.
Atij iu ndërpre mikrofoni nga kryegjyqtari duke i sqaruar që pasi të përfundojnë pyetjet dhe dëshmia e tij, atëherë ai mund t’i ngre shqetësimet e tij.
Ndërsa, në pyetjet e prokurores, Vega Iodice, ai ka thënë është ish-ushtar i Jugosllavisë në Sarajevë.
“Kam qenë ish-ushtarë i Jugosllavisë në vitin 83-84 në Sarajevë”, ka deklaruar ai.
Sipas kryegjyqtarit, dëshmia e këtij dëshmitari pritet të zgjasë rreth 3 ditë. Prokuroria ka parashikuar rrethe 6 orë ndërsa ekipet e mbrojtjes rreth 8 orë e gjysmë për kundërpyetjet e veta.
