Izraeli duket se ka filluar ta vëjë në funksion planin e shpopullimit të Gazës.
Ushtria e këtij vendi ka thënë se nuk do të lejoj kthimin e banorëve në shtëpitë e tyre.
Dyshimet ishin krijuar më herët se qeveria e Izraelit po ekzekuton një plan të quajtur “plani i gjeneralëve”.
Duke folur në një konferencë për media të martën, gjeneral brigade i IDF, Itzik Cohen tha se disa trupa kanë pushtuar zonat në veri të Gazës dy herë, dhe kështu për të parandaluar një përpjekje të tretë, “nuk ka asnjë qëllim që të lejohen banorët e Rripit verior të Gazës të kthehen në shtëpitë e tyre”.
Ai gjithashtu zbuloi se duke qenë se nuk ka më “civilë të mbetur” në Gazën veriore, ndihma humanitare nuk do të hyjë në pjesën veriore të rajonit.
Cohen tha se do të lejohej hyrja “e rregullt” në jug.
Megjithatë, ka ende banorë në veri, të cilët aktualisht raportojnë se operacionet e fundit kanë krijuar disa nga kushtet më të këqija në zonë që nga fillimi i pushtimit.
Javën e kaluar, një sulm izraelit në një ndërtesë pesëkatëshe ku palestinezët e zhvendosur ishin strehuar në Rripin verior të Gazës vrau të paktën 60 persona, më shumë se gjysma prej tyre gra dhe fëmijë, tha ministria e shëndetësisë e Gazës.
Komentet e IDF vijnë pasi ushtria izraelite ka zgjeruar operacionin e saj tokësor njëmujor në Gazën veriore në një qytet që është bombarduar rëndë që nga ditët e para të luftës.
Ushtria tha në një deklaratë të enjten se “trupat filluan të operojnë” në zonën e Beit Lahiya pasi inteligjenca tregoi praninë e militantëve atje.
Plani dyshohet të shpopullojë veriun e Gazës duke u dhënë palestinezëve të bllokuar atje një mundësi për t’u evakuuar dhe më pas duke i trajtuar ata që qëndrojnë si luftëtarë – duke çuar në një rrethim.
