Forcat izraelite kanë bombarduar një shkollë të shndërruar në strehë në qytetin e Gazës, duke shkaktuar një zjarr dhe duke vrarë të paktën 36 palestinezë, përfshirë disa fëmijë.
Në përgjithësi, më shumë se 50 persona janë vrarë në sulme që nga agimi i së hënës.
Vrasjet ndodhen në kohën kur ushtria izraelite ka lëshuar një urdhër të ri për të detyruar zhvendosjen e njerëzve në Khan Younis, Bani Suheila, Abasan dhe al-Qarara në Gazën jugore.
Në një deklaratë për X, zëdhënësi Avichay Adraee tha se ushtria kishte nisur “një sulm të paparë” për të shkatërruar aftësitë e organizatave “terroriste” dhe u tha banorëve të largoheshin për në zonën al-Mawasi përgjatë bregdetit.
E ashtuquajtura zonë e sigurt e al-Mawasit është sulmuar vazhdimisht nga Izraeli, me organizatat humanitare që theksojnë se nuk ka vend të sigurt në Gaza.
Ngjarjet e fundit kanë bërë që nga shtetet e BE-së të rriten edhe më shumë kundërshtimet e ashpra.
Kancelari gjerman Friedrich Merz tha se sulmet e fundit të Izraelit në Rripin e Gazës po shkaktojnë pasoja humanitare mbi civilët, të cilat nuk mund të justifikohen më si një fushatë ushtarake kundër “terrorizmit”.
“Dëmtimi i popullsisë civile në një masë të tillë, siç ka ndodhur gjithnjë e më shumë ditët e fundit, nuk mund të justifikohet më si luftë kundër terrorizmit të Hamasit”, i tha transmetuesit WDR në një intervistë televizive.
“Nuk e kuptoj çfarë po bën ushtria izraelite tani në Gaza, ta them hapur”, tha Merz.
Ai shtoi se kishte planifikuar një telefonatë me Netanyahun këtë javë për t’i thënë atij “të mos e tepronte”, megjithëse, për “arsye historike”, Gjermania do të ishte gjithmonë më e kujdesshme në kritikat e saj sesa disa partnerë evropianë.
Një kujtesë se Merz tha në shkurt se do të sigurohej që kryeministri izraelit të mund të vizitonte Gjermaninë pavarësisht një urdhër-arresti të lëshuar kundër tij nga Gjykata Ndërkombëtare Penale (ICC) për krime të dyshuara lufte në Gaza.
Si shtet anëtar i gjykatës, Gjermania është e detyruar të ndalojë të dyshuarit që përballen me urdhër-arreste nëse ata shkelin në tokën e saj, por Gjykata Penale Ndërkombëtare nuk ka asnjë mënyrë për ta zbatuar këtë.
