Ushtria izraelite ka njoftuar se forcat e saj ajrore sapo kanë përfunduar një sulm ndaj një centrali bërthamor iranian në zonën e Isfahanit.
Vendndodhja nuk u godit gjatë sulmeve të mëparshme izraelite ndaj objekteve bërthamore të Iranit, duke shënuar një zgjerim të operacionit ushtarak të nisur këtë mëngjes.
IDF pretendon se vendi ka qenë duke kaluar nëpër një proces të “rikonvertimit të uraniumit të pasuruar”.
“Sulmi shkatërroi një strukturë për prodhimin e uraniumit metalik, infrastrukturën për konvertimin e uraniumit të pasuruar, laboratorë dhe infrastrukturë tjetër”, thuhet në të.
Ambasadori i Izraelit në OKB, Danny Danon, i justifikoi sulmet ndaj Iranit duke pretenduar se kërcënimi që paraqiste Teherani “mori një kthesë dramatike” në muajt e fundit.
Ai tha se Teherani po planifikonte një “sulm të papritur” ndaj Izraelit, pa dhënë prova.
Këto zhvillime kanë bërë që bisedimet bërthamore midis SHBA-së dhe Iranit, të planifikuara të zhvilloheshin të dielën në Oman, nuk do të vazhdonin më, sipas televizionit shtetëror iranian.
Nga ana tjetër, ministri i Jashtëm i Iranit, Abbas Araghchi, i ka shkruar OKB-së duke kërkuar që ajo ta mbajë Izraelin përgjegjës për “aktin e tij të paturpshëm dhe të paligjshëm të agresionit”.
Në mënyrë specifike, ai tha se sulmi “i pamatur” në uzinën bërthamore të Natanzit “jo vetëm që ka rrezikuar jetën e civilëve iranianë, por gjithashtu ka paraqitur një kërcënim alarmues për paqen dhe sigurinë rajonale dhe ndërkombëtare duke rrezikuar një katastrofë radiologjike”.
Araghchi e etiketoi gjithashtu vrasjen e zyrtarëve të lartë ushtarakë dhe shkencëtarëve si “akte të qëllimshme dhe të paramenduara që përbëjnë raste të qarta të terrorizmit shtetëror”.
Ai shtoi se Irani “do të veprojë me vendosmëri të plotë për të mbrojtur sovranitetin, popullin dhe sigurinë e tij kombëtare” dhe “Izraeli do të pendohet thellësisht për këtë agresion të pamatur dhe për gabimin e rëndë strategjik që ka bërë”.
