Gjatë seancës plenare të Kuvendit të Kosovës, shefja e Grupit Parlamentar të LDK-së, Jehona Lushaku-Sadriu, ka hedhur akuza të rënda ndaj institucioneve dhe kompanive energjetike, duke deklaruar se qytetarët po mashtrohen me llogaritjen e shpenzimit të energjisë elektrike.
Lushaku-Sadriu u bëri thirrje organeve kompetente të veprojnë, duke ritheksuar se bazuar në hulumtimet e bëra nga Visar Azemi (LDK), ka rezultuar se njehsorët në Prishtinë dhe Ferizaj nuk e llogarisin saktë kohën e shpenzimit.
„Dua ta ngre një temë që është shumë e rëndësishme për çdo familje në Kosovë; një çështje që ka të bëjë me një mashtrim përmes keqllogaritjes së shpenzimit të energjisë elektrike. Kjo prek secilin prej nesh. Është një padrejtësi që po bëhet prej muajsh apo vitesh me radhë“, deklaroi deputetja.
Dështimi i tarifës së lirë Sipas Lushaku-Sadriut, thirrjet e qeverisë për kursim dhe shfrytëzim të rrymës pas orës 22:00 po dalin të jenë të kota për shkak të defekteve teknike në matje, të cilat rëndojnë buxhetin e familjeve kosovare.
“Teksa kemi dëgjuar Qeverinë që u ka bërë thirrje qytetarëve ta kursejnë energjinë elektrike, të presin e të shpenzojnë pas orës 22:00, ne sot kemi parë që shumica e njehsorëve nuk e llogarisin saktë kohën. Kjo çon te një llogaritje më e madhe dhe faturim më i shtrenjtë për çdo familje”, shtoi ajo.
Deputetja e LDK-së hodhi gishtin e përgjegjësisë drejt institucioneve rregullatore dhe kompanive të shpërndarjes, duke kërkuar llogaridhënie të menjëhershme për këtë “vjedhje” teknike që po u bëhet qytetarëve në emër të shpenzimeve të energjisë.
