Një incident i rëndë është shënuar në fillim të kësaj jave në lagjen Ulpiana të Prishtinës, ku mjeku i njohur Afrim Veliu u sulmua fizikisht në rrethana të dyshimta.
Burime të sigurta të storm• raportojnë se sulmi lidhet me refuzimin e doktor Veliut për të kryer një abort të jashtëligjshëm, në kundërshtim me ligjin dhe etikën profesionale mjekësore.
Sipas burimeve nga hetuesia, një person kishte kërkuar nga mjeku që të kryente një abort jashtë kornizës ligjore. Doktor Veliu, duke vepruar në përputhje me detyrimin e tij profesional dhe moral, kishte refuzuar prerazi të realizonte ndërhyrjen. Kjo besohet të ketë nxitur sulmin e dhunshëm që ndodhi më pas.
Ndërkohë, Policia e Kosovës, përmes një njoftimi për media një ditë më vonë, ka konfirmuar ngjarjen, teksa njofton se viktima ka pësuar lëndime si shkak i goditjes në kokë me mjete metalike.
“Sipas informacioneve të para, dyshimet janë ngritur se, teksa po futej në veturë, viktima është goditur në kokë me një mjet metalik nga një person i panjohur. Viktima ka pësuar lëndime të lehta dhe ka marrë trajtim mjekësor. I dyshuari është larguar nga vendi i ngjarjes, ndërsa motivi i sulmit mbetet i panjohur. Policia ka dalë menjëherë në vendin e ngjarjes dhe ka nisur ndërmarrjen e veprimeve operative dhe hetimore për identifikimin dhe kapjen e të dyshuarit. Me rekomandimin e prokurorit të shtetit është iniciuar një hetim në drejtim të veprës penale ‘Lëndim i lehtë trupor’”, thuhet në njoftimin e Policisë së datës 21 maj.
Sipas autoriteteve, viktima ka pësuar lëndime të lehta dhe ka marrë trajtim mjekësor, ndërsa i dyshuari është larguar nga vendi i ngjarjes. Motivi i sulmit, sipas policisë, “mbetet ende i panjohur”, ndërkohë që burimet e storm• sugjerojnë një prapavijë më të ndërlikuar që lidhet me kërkesën për abort të paligjshëm.
Policia ka ndërmarrë veprime operative dhe hetimore për identifikimin dhe kapjen e autorit të dyshuar. Me rekomandimin e prokurorit të shtetit, është iniciuar një hetim për veprën penale ‘Lëndim i lehtë trupor’.
storm• do të vazhdojë raportimin për këtë rast dhe do të publikojë të gjitha zhvillimet e reja sapo të konfirmohen nga burime zyrtare ose të afërta me hetimet.
