Kim Yo-jong, motra e fuqishme e liderit verikorean, ka lëshuar një paralajmërim të ashpër ndaj Seulit zyrtar, duke deklaruar se çdo përsëritje e incidenteve me dronë do të pasohet me një përgjigje që “tejkalon proporcionalitetin”.
Në një deklaratë të publikuar sot (13 shkurt 2026) nga Agjencia Qendrore e Lajmeve Koreane (KCNA), Kim Yo-jong vlerësoi si një “veprim të ndjeshëm” shprehjen e keqardhjes nga Ministri i Bashkimit i Koresë së Jugut, Chung Dong-young. Megjithatë, ajo theksoi se vetëm pendimi nuk mjafton për të mbyllur krizën.
“Nuk na intereson kush i nisi“ Kim ishte e prerë: Veriut nuk i intereson nëse dronët u dërguan nga individë apo grupe civile. Faktori i vetëm që ka rëndësi për Phenianin është se “shkelja e rëndë e sovranitetit” erdhi nga territori i Koresë së Jugut. “Autoritetet e Jugut nuk duhet të përpiqen të fshehin krizën që shkaktuan me shprehje keqardhjeje, por duhet të garantojnë parandalimin e tyre,” shtoi ajo.
Paralajmërimi për kundërsulm Sipas saj, Koreja e Veriut ka disa plane kundërsulmi gati dhe do të zgjedhë njërin prej tyre nëse shkeljet përsëriten. Ky kërcënim vjen pasi një student 30-vjeçar nga Seuli pranoi publikisht në një intervistë televizive se ishte ai që kishte dërguar dronin drejt Veriut, duke nxitur një hetim të përbashkët ushtarako-policor në Jug me urdhër të Presidentit Lee Jae-myung.
Situata mbetet tejet e tensionuar në gadishull, me Phenianin që kërkon garanci absolute se hapësira e tij ajrore nuk do të shkelet më.
