KINA MBAN KARBURANTIN PËR VETE — ANULON DËRGESA DHE NGRE ALARMIN NË TREGJET GLOBALE
Kina ka pezulluar eksportet e produkteve të rafinuara të naftës drejt tregjeve jashtë Hong Kongut dhe Makaos, ndërsa gjiganti shtetëror PetroChina ka anuluar disa dërgesa të benzinës dhe karburantit të avionëve të planifikuara për muajin tetor.
Sipas Reuters, vendimi lidhet me përpjekjet e Pekinit për të mbrojtur furnizimin e brendshëm me karburante, në një periudhë kur tregjet globale tashmë po përballen me mungesa të furnizimeve nga Lindja e Mesme dhe Rusia.
PetroChina kishte rënë dakord për shumicën e dërgesave të anuluara vetëm gjatë dy javëve të fundit, por ato tashmë janë tërhequr nga planet e eksportit. Edhe Zhejiang Petrochemical, një prej rafinerive më të mëdha private kineze, nuk ka planifikuar dërgesa të produkteve të naftës gjatë javës së festave kombëtare kineze.
Pekini ende nuk u ka dhënë rafinerive kryesore miratimin për të rifilluar eksportet drejt tregjeve jashtë Hong Kongut dhe Makaos. Nuk është e qartë nëse lejet do të rikthehen pas përfundimit të festës kombëtare më 7 tetor. Vendimi mund ta shtrëngojë më tej furnizimin global me karburante. Reuters raporton se marzhet aziatike të rafinimit të dizelit janë rritur në rreth 75 dollarë për fuçi, ndërsa tregtarët po përgatiten për një treg edhe më të ngushtë.
Kjo vjen në një moment delikat: furnizimet nga Lindja e Mesme dhe Rusia tashmë janë nën presion, ndërsa çdo tërheqje e Kinës nga tregu i eksporteve mund të reduktojë edhe më shumë sasinë e benzinës, dizelit dhe karburantit të avionëve në dispozicion të vendeve importuese.
Nëse Pekini e zgjat kufizimin edhe pas 7 tetorit, ndikimi mund të ndihet shumë përtej Kinës — veçanërisht në Azi, ku vendet importuese varen nga furnizimet kineze me produkte të rafinuara.
