E ardhmja e Granit Xhakës vazhdon të jetë ende e mjegullt.
Për një kohë të gjatë, emri i tij ishte i lidhur me një kalim të mundshëm te Milani, por ky transferim përfundimisht dështoi.
Sipas mediumit italian “Gazzetta dello Sport”, një tjetër klub i madh italian, po shfaq interes serioz për shërbimet e tij.
Fjala është për Juventusin, i cili ka shprehur interesimin e hapur për transferimin e Xhakës, vlera e të cilit pritet të jetë mes 12 dhe 15 milionë euro.
Megjithatë, nënshkrimi i Xhakës nga Zonja e Vjetër do të realizohej vetëm nëse klubi arrin ta shesë Douglas Luiz.
Braziliani është në listën për t’u larguar, ndërsa në mesin e zëvendësuesve të mundshëm janë Xhaka dhe Sandro Tonali.
Raportet e fundit thonë se Tonali ka përparësi në listën e Juventusit, por Xhaka mbetet një opsion i hapur dhe realist për repartin e mesfushës edhe për faktin se ka kosto shumë herë më të ulët se italiani.
