Akademia e Shkencave dhe e Arteve e Kosovës, si institucioni më i lartë shkencor dhe artistik në vend, në bashkëpunim me Akademinë e Shkencave të Shqipërisë, organizoi konferencën shkencore me temë “Hoxha Kadri Prishtina dhe roli i Komitetit ‘Mbrojtja Kombëtare e Kosovës’”.
Në këtë konferencë morën pjesë edhe përfaqësues nga Akademia e Shkencave e Shqipërisë, ndër të cilët akademiku Marenglen Verli, anëtar i Këshillit Organizues, së bashku me akademikun Beqir Meta.
Nga Instituti i Historisë pranë AShSh-së mori pjesë edhe prof. asoc. dr. Sali Kadria.
Punimet e konferencës u hapën nga kryetari i Këshillit Organizues, Jusuf Bajraktari.
Aktiviteti u organizua në dy seanca, gjatë të cilave u paraqitën kumtesa që trajtuan aspekte të ndryshme të kontributeve historike të këtij komiteti, duke përfshirë dimensionin diplomatik, rolin në çështjen kombëtare, si dhe burimet arkivore dhe trajtimet historiografike.
Fjalën e mbylljes e mbajti akademiku Verli i cili theksoi rëndësinë e studimit të mëtejshëm dhe rivlerësimit të veprimtarisë së Komitetit Mbrojtja Kombëtare e Kosovës, në kuadër të historisë kombëtare, avancimit të kërkimeve në arkiva si dhe të forcimin të bashkëpunimit ndërinstitucional në trajtimin e temave historike dhe realizimin e botimeve cilësore në këtë fushë.
