Kryetari i AAK-së, Ramush Haradinaj, ka njoftuar se Dardan Krasniqi i është bashkuar partisë së tij.
Krasniqi ka qenë ish-aktivist i Lëvizjes Vetëvendosje (LVV) dhe është kunati i nënkryetares së Vetëvendosjes, Albulena Haxhiu.
“Në ekipin tim e prita me kënaqësi Ekspertin e Sigurisë, juristin Dardan Krasniqi. Dardani na u bashkua me përvojën e tij dhe vullnetin për një Kosovë që ecën përpara. Dardani, si i ri, ishte luftëtar e i tri luftërave çlirimtare, UÇK-së, UÇPMB-së dhe i Ushtrisë Çlirimtare Kombëtare, ku ishte dalluar për guximin dhe aftësinë organizative.
Haradinaj shtoi: “Dardani vjen në AAK me një përvojë politike dhe aktivitet 25-vjeçar. Dardan Krasniqi ishte polici dhe drejtuesi i parë i Policisë në Malishevë. Z. Krasniqi vjen nga një familje patriotike, me nënën mësuese e babain kolonel të TMK-së dhe themelues të celulave të para të UÇK-së”.
Haradinaj foli për aktivitetin e tij dhe përmendi edhe atë në Vetëvendosje.
“Në aktivitetin e tij si çlirimtar, pastaj në polici, e më vonë në Vetëvendosje si aktivist e anëtar i Këshillit të Përgjithshëm, Dardani gjithmonë kishte dy qëllime: çështjen kombëtare dhe politikën e sigurisë si një element të rëndësishëm në përpjekjen për shtet e shoqëri të fortë! Angazhimi i tij është motiv që shumë patriotë, ekspertë e qytetarë të mirë të këtij vendi po e gjejnë rrugën e AAK-së, që është edhe rruga e Kosovës për të ecur përpara!”.
