Kryeministri Kurti i shkon për vizitë “Oligarkut të Muzikës”, Sabri Fejzullahut
Me afrimin e zgjedhjeve, Kryeministri i Kosovës, Albin Kurti, po intensifikon aktivitetet e tij me figura të shquara që kanë ndikim tek masa elektorale. Një nga këto takime ishte edhe vizita te këngëtari i njohur Sabri Fejzullahu, një figurë e përhershme në skenën muzikore shqiptare, me mbi 80 koncerte vetëm në dy muajt e fundit. Në një postim në profilin e tij në Facebook, Kurti e cilësoi Fejzullahun si një artist të pandalshëm, ndërsa përgëzoi kontributin e tij për kulturën shqiptare.
Fejzullahu, i cili sot mbushi 77 vjet (gëzuar ditëlindjen!), është një artist i njohur jo vetëm në Kosovë, por edhe në diasporë, ku për dekada të tëra ka argëtuar mijëra shqiptarë në botë. Megjithatë, Fejzullahu nuk është vetëm këngëtar – në vitet e pasluftës ai ishte edhe deputet në Kuvendin e Kosovës, përfaqësues i Partisë Demokratike të Kosovës, një kundërshtare e natyrshme e Lëvizjes Vetëvendosje dhe Kryeministrit Kurti.
A mund të jetë kjo vizitë një hap i menduar mirë për të shfrytëzuar ndoshta influencën politike dhe elektorale të Fejzullahut? Ndoshta Partia Demokratike e Kosovës nuk e ka përdorur mjaftueshëm këtë aset të vlefshëm, por duket se Kurti ka plane të tjera. Në fund të fundit, muzika dhe politika shpesh janë ndërthurur për të ndikuar masat, dhe Sabri Fejzullahu, si “oligarku i muzikës”, mund të jetë një figurë kyçe në këtë aspekt.
by: storm-rks + profilet e të apostrofuarve
