Kryeministri në detyrë i Kosovës, Albin Kurti, takoi kryeministrin e Mbretërisë së Belgjikës, Bart De Wever, në kuadër të Javës së Nivelit të Lartë të Asamblesë së Përgjithshme të Kombeve të Bashkuara.
Marrëdhëniet bilaterale dhe fushat e mundësitë me interes të përbashkët, ishin çështjet kryesore të diskutimit, e në mesin e tyre, theks të veçantë pati bashkëpunimi në fushën e mbrojtjes dhe rritja e shkëmbimeve tregtare, thuhet në komunikatën e Zyrës së Kryeministrit.
Sipas komunikatës, së fundmi, Brukseli zyrtar ka njoftuar se do të mirëpresë atasheun e mbrojtjes së Kosovës, kurse në muajin korrik, në një tjetër hap të rëndësishëm për thellimin e raporteve në fushën e mbrojtjes, ministritë e mbrojtjes së dy vendeve nënshkruan Deklaratën e Qëllimit të Përbashkët në këtë fushë.
“Kryeministri u shpreh se këto zhvillime janë pozitive dhe të rëndësishme për marrëdhëniet dhe bashkëpunimin ndërmjet vendeve tona, por në të njëjtën kohë për paqen dhe sigurinë, marrë parasysh kompleksitetin dhe brishtësinë e situatës gjeopolitike globale”, thuhet në komunikatë.
Gjatë takimit, kryeministri në detyrë falënderoi kryeministrin De Wever për mbështetjen e vazhdueshme të Belgjikës ndaj shtetit të Kosovës, për kontributin e vazhdueshëm në fushën e sigurisë dhe për angazhimin tonë të palëkundur për integrim evropian dhe NATO.
“Ky takim bilateral, që njëherësh ishte i pari ndërmjet kryeministrit Kurti dhe kryeministrit De Wever, u zhvillua në hapësirat e Misionit të Përhershëm të Belgjikës në Kombet e Bashkuara”, thuhet tutje në komunikatë.
