Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka deklaruar se pret që stabilizimi i çmimit të naftës të vazhdojë në ditët në vijim, si pasojë e arritjes së marrëveshjes për armëpushim mes SHBA-së dhe Iranit.
Kusari-Lila theksoi se mekanizmi ekzistues për përcaktimin e çmimeve maksimale të lejuara (tavani i çmimit) nuk do të lejojë rritje mbi normën e paraparë, duke mbrojtur kështu konsumatorët nga lëkundjet e mundshme të tregut.
„Uroj që stabilizimi i çmimit të naftës dhe derivateve të vazhdojë ditëve në vijim. Kjo do të varet shumë nga rrethanat në Lindjen e Mesme. Mekanizmi ynë deri më tani ka dhënë rezultatet e veta; ndoshta jo në nivelin 100%, sepse ka pasur lëvizje të çmimeve, por gjithsesi në situatën kur do të kemi qarkullim të lirë në Ngushticën e Hormuzit dhe mungesë ndikimi në bursa ndërkombëtare, atëherë edhe në Kosovë do të hiqet mekanizmi i përcaktimit me marzhë“, deklaroi ministrja.
Monitorim i vazhdueshëm i tregut Sipas saj, nevojitet një periudhë më e gjatë se një ditë për të përcaktuar saktë nëse tregu ka kaluar në një situatë plotësisht normale. Ajo bëri të ditur se Ministria që ajo drejton është në monitorim të vazhdueshëm të të dhënave të importit.
„Ne e vlerësojmë situatën dy herë në ditë dhe marrim informata mbi çmimin e importit të naftës dhe derivateve të saj. Prandaj, e kemi në fuqi mekanizmin e marzhës, i cili nuk do të lejojë që çmimi të shkojë mbi normën e përcaktuar“, përfundoi Kusari-Lila.
