Policia e Kosovës ka njoftuar se gjatë ditës së sotme ka ndodhur një grabitje e armatosur në një institucion mikrofinanciar në Prishtinë.
Këtë për media e ka konfirmuar zëdhënësja e Policisë për rajonin e Prishtinës, Flora Ahmeti.
Ahmeti ka bërë me dije se, policia po kryen veprimet e nevojshme policore me qëllim të zbardhjes së rrethanave të rastit, si dhe identifikimin dhe arrestimin e personit të dyshuar.
“Sot rreth orës 16:00 është raportuar për një grabitje të ndodhur në një institucion mikrofinanciar në rrugën “Robert Doll” në Prishtinë”, ka thënë policia.
“Pas marrjes së informacionit policia ka dalë në vendngjarje dhe bazuar në informacionet e para, dyshohet se një person i dyshuar nën kërcënim të armës ka grabitur një shumë parash”, ka thënë policia.
“Aktualisht policia po kryen veprimet e nevojshme policore me qëllim zbardhjen e rrethanave të rastit si dhe identifikimin dhe arrestimin e personit të dyshuar”, ka thënë policia.
