Kryetari i Lidhjes Demokratike të Kosovës (LDK), Lumir Abdixhiku, ka bërë të ditur përmes një postimi në profilin e tij zyrtar në Facebook se partia ka nisur zyrtarisht fazën e parë të konsultimeve dhe përgatitjeve për Zgjedhjet Lokale të vitit 2025. Takimi i parë është mbajtur me kryetarët e degëve të LDK-së.
Në këtë fazë fillestare, LDK synon një proces të hapur dhe gjithëpërfshirës për përzgjedhjen e kandidatëve për kryetarë komunash dhe asamblistë, duke vënë theksin në integritetin, profesionalizmin dhe përkushtimin qytetar të kandidatëve të mundshëm.
“LDK mbetet shtëpi e vlerave të qëndrueshme dhe vizionit të qartë për zhvillimin e komunave,” ka theksuar Abdixhiku, duke ftuar qytetarët që ndajnë vlerat e partisë të bëhen pjesë e këtij procesi.
Duke e kujtuar fitoren në zgjedhjet e fundit lokale dhe udhëheqjen aktuale në nëntë komuna me gjithsej 206 këshilltarë lokalë, LDK shpreh besim në përfaqësimin e saj dhe shpreh përkushtimin për një fushatë të suksesshme dhe gjithëpërfshirëse.
