Tri pengje izraelite të mbajtura nga Hamasi, janë liruar këtë të dielë pas hyrjes në fuqi të marrëveshjes së armëpushimit.
Romi Gonen, Doron Steinbrecher dhe Emily Damari u ribashkuan me familjarët e tyre.
“Pengjet e liruar janë aktualisht në rrugën e tyre për në një pikë pritjeje fillestare në jug të Izraelit, ku do t’i nënshtrohen një vlerësimi fillestar mjekësor”, tha ushtria.
Presidenti i SHBA Joe Biden u tha gazetarëve të dielën se ishte “i kënaqur” që ekipi i tij dhe ekipi i presidentit të zgjedhur Trump folën me “një zë në ditët e fundit”, për të ndihmuar në finalizimin e armëpushimit të Gazës dhe marrëveshjes së pengjeve.
“Ishte edhe e nevojshme, edhe efektive dhe e paprecedentë, por suksesi do të kërkojë këmbëngulje dhe mbështetje të vazhdueshme për miqtë tanë në rajon dhe besimin në diplomaci të mbështetur nga parandalimi. Tani i takon administratës së ardhshme të ndihmojë në zbatimin e kësaj marrëveshjeje”, tha Biden.
Nga ana tjetër, Izraeli përmes Kryqit të Kuq ka liruar mbi 90 të burgosur palestinez, mes tyre 69 gra dhe nëntë të mitur, më i vogli prej të cilëve 15 vjeç.
Izraeli mban të paktën 10,000 të burgosur palestinezë, sipas Komisionit të Çështjeve të të Burgosurve dhe Shoqatës së të Burgosurve Palestinez – megjithëse ky numër nuk përfshin një numër të panjohur të palestinezëve të zënë rob në Gaza.
Krahu i armatosur i Hamasit ka thënë se është i përkushtuar ndaj marrëveshjes së armëpushimit dhe afatit kohor për lirimin e pengjeve – nëse është edhe Izraeli.
Ndërsa armëpushimi hyri në fuqi të dielën në mëngjes në Gaza, palestinezët që nisën të ktheheshin në lagjet e tyre të shkatërruara, shprehën gëzimin për paqen dhe pikëllimin për gjithçka që kishin humbur.
Armëpushimi potencialisht do t’u japë civilëve në Gaza natën e parë të pushimit pa sulme apo operacione ushtarake në më shumë se një vit.
Në qytetin jugor të rrafshuar të Rafahut, turmat u kthyen për të kërkuar çdo gjë që qëndron ende nga lagjet e tyre. Mahmud Ebu Hilal u shpreh i tronditur për atë që dikur ishte shtëpia e tij.
“Çfarë fituam ne?… Kam katër shtëpi, të gjitha të rrafshuara. Ku jam? A është kjo shtëpia ime? A është kjo jeta ime?” pyeti ai.
Mohammad Al Qadi, një banor i zhvendosur në Rafah, ishte po aq i shqetësuar.
“Ne nuk kemi jetë; ne do të jetojmë në rrugë. Erdha duke shpresuar të shihja shtëpinë time ende në këmbë, por e gjeta të shkatërruar”, tha Al Qadi nga Rafah.
Në Gazën veriore, njerëzit mbanin sende me karroca gomari dhe biçikleta, ndërsa kërkonin shtëpitë e tyre. Disa festuan armëpushimin, duke shpërndarë ëmbëlsira.
“Të mbijetosh vdekjen është një gjë e gëzueshme. Edhe pse po shkojmë në një fazë të vështirë dhe të pasigurt, mendimi për të mos humbur më njerëzit që do, për të fjetur një natë pa frikën se do të humbasësh dikë të dashur për ty, është me të vërtetë një lehtësim”, tha Hala Shehada nga veriu i Gazas.
Njerëzit në veri shprehën gëzimin pas hyrjes në fuqi të armëpushimit, por janë të shqetësuar se si familjet e tyre do t’i përballojnë ditët në vijim.
“Shtëpia ime u shkatërrua gjashtë muaj më parë… ne mund të jetojmë në një tendë, por unë mund të qëndroj në një karvan për hir të fëmijëve”, tha Talal Abu Al-Sayed nga Jabalya.
