1,200 pilotë shkaktuan një stuhi të madhe brenda Izraelit, pasi nënshkruan një letër të hapur ku argumentonin se lufta në Gaza po i shërbente kryesisht “interesave politike dhe personale dhe jo atyre të sigurisë”.
Kryeministri izraelit Benjamin Netanyahu tha se letra origjinale ishte shkruar nga “mollë të këqija”.
Por Guy Paron, një ish-pilot dhe një nga nënshkruesit e letrës, tha se qeveria izraelite kishte dështuar të kalonte në fazën e dytë të marrëveshjes së armëpushimit me Hamasin, të ndërmjetësuar nga Presidenti i SHBA-së, Donald Trump.
Ajo marrëveshje kërkonte një tërheqje të plotë të forcave izraelite nga Gaza dhe lirimin e të gjithë pengjeve të mbetura. Ndërkohë Netanyahu vazhdon të argumentojë se lufta duhet të vazhdojë të ushtrojë presion mbi Hamasin.
Paron tha se qeveria (izraelite) “hoqi dorë ose shkeli një marrëveshje të nënshkruar me Hamasin” dhe “e hodhi atë në plehra”.
“Duhet ta përfundosh marrëveshjen, të lirosh pengjet, edhe nëse kjo do të thotë ta ndalosh atë luftë”, argumentoi ai.
Nuk është hera e parë që pilotët izraelitë kanë ndërmarrë një kauzë. Shumë prej tyre bënë gjithashtu fushatë kundër reformave gjyqësore të Netanyahut të vitit 2023.
“Në këtë vend, 1,000 pilotë të Forcave Ajrore Izraelite mbajnë shumë peshë”, shtoi Paron.
“Forca Ajrore historikisht ka qenë forca kryesore dhe ndryshuesi i lojës në të gjitha luftërat e Izraelit, përfshirë edhe këtë të tanishmen. Fuqia e Forcave Ajrore është garancia e sigurisë së publikut”.
Tani, fushata e letrave të hapura është përhapur në pjesë të tjera të ushtrisë.
Më shumë se 15,000 persona kanë nënshkruar, përfshirë parashutistë, trupa të blinduara, marinë, njësi speciale, kibernetikë dhe mjekë.
Dr. Ofer Havakuk ka shërbyer 200 ditë gjatë kësaj lufte si mjek luftimi, kryesisht në Gaza, dhe beson se qeveria po e vazhdon luftën për të qëndruar në pushtet.
Ai gjithashtu ka nënshkruar një letër të hapur në mbështetje të pilotëve dhe ka akuzuar kryeministrin se po vë politikën në plan të parë.
Ai tha se Netanyahu “dëshiron ta mbajë koalicionin e tij funksional dhe ta mbajë të bashkuar. Për të, ky është qëllimi kryesor i luftës”.
Një armëpushim mund të çojë në rrëzimin e koalicionit të brishtë të ekstremit të djathtë të kryeministrit, i cili është kundër përfundimit të luftës.
Ushtria izraelite ka kërcënuar se do të pushojë nga puna ata që kanë nënshkruar letra proteste.
“Ky është një çmim që jam i gatshëm ta paguaj, megjithëse është shumë i madh për mua sepse jam vullnetar dhe, si vullnetar, dua të qëndroj në detyrë për aq kohë sa të mundem”, u ka thënë mediave një nga ushtarët.
Polemika mbi luftën dhe pengjet po fiton vrull brenda ushtrisë izraelite.
Gjithashtu, po ekspozon përçarje të thella në shoqëri në një kohë kur nuk ka asnjë shenjë të qartë se si qeveria planifikon ta përfundojë luftën në Gaza, ose kur.
Më shumë se 51,000 njerëz janë vrarë në Gaza gjatë përgjigjes së ushtrisë izraelite, shumë prej tyre civilë, sipas Ministrisë së Shëndetësisë të enklavës së drejtuar nga Hamasi.
