Sekretari amerikan i Shtetit Antoni Blinken mbërrin këtë të martë në Izrael, ndalesa e parë e turneut në Lindjen e Mesme që synon ringjalljen e bisedimeve të armëpushimit në Gaza dhe diskutimin e së ardhmes së enklavës pas vdekjes së liderit të Hamasit, Yahya Sinëar.
Udhëtimi i fundit i diplomatit të lartë amerikan, i njëmbëdhjeti në rajon që kur militantët palestinezë të Hamasit sulmuan Izraelin jugor më 7 tetor duke shkaktuar luftën në Gaza, vjen pasi ushtria izraelite ka intensifikuar fushatën e saj në enklavën palestineze si dhe në Liban kundër Iranit.
Udhëtimi i planifikuar njëjavor i Blinken, i cili do të përfshijë një ndalesë në Jordani të mërkurën (23 tetor) dhe Doha, vjen gjithashtu ndërsa rajoni po përgatitet për përgjigjen e Izraelit ndaj sulmit me raketa balistike të Iranit më 1 tetor.
Hakmarrja mund të prishë tregjet e naftës dhe rrezikon të ndezë një luftë të plotë midis armiqve të mëdhenj.
“Në Gaza, Blinken do të përqendrojë diskutimet se si t’i jepet fund luftës, planet për enklavën pas përfundimit të luftimeve dhe si të përmirësohet ndihma humanitare”, tha një zyrtar i lartë i Departamentit të Shtetit, duke folur në kushte anonimiteti.
Javën e kaluar Blinken dhe Sekretari i Mbrojtjes i SHBA-së Loid Austin u shkroi zyrtarëve izraelitë ku kërkonte masa konkrete për trajtimin e situatës së përkeqësuar në Gaza, ose do të përballeshin me kufizime të mundshme për ndihmën ushtarake të SHBA.
Zyrtari tha se në takimet e tij me Izraelin dhe vendet arabe, Blinken do të shqyrtojë çështjet sigurisë, qeverisjes dhe rindërtimit.
“Sekretari i Shtetit do të diskutojë gjithashtu me Izraelin dhe vendet e tjera se si të sigurojë një zgjidhje diplomatike për konfliktin me Hezbollahun dhe do të vazhdojë bisedën e Uashingtonit me izraelitët rreth përgjigjes së tyre të pritshme ndaj sulmit raketor të Iranit”, tha zyrtari.
