Liderët evropian kanë reaguar pas deklaratave të presidentit amerikan Donald Trump, sipas të cilit edhe pse situata nuk është e lehtë, ai ka besim se do ia dalin të arrihet paqja në Ukrainë.
“Mendoj se po i afrohemi shumë një marrëveshjeje që do ta zbulojmë… Mendoj se po bëjmë përparim”, tha shkurt Trump për mediat.
Udhëheqësi amerikan përsëriti fjalët e thëna edhe më parë për përfundimin e disa luftërave në nivel global dhe se si ai priste që ndalimi i pushtimit të Ukrainës nga Rusia të ishte më i lehtë nga ç’ka qenë.
Nga Berlini, kancelari i Gjermanisë, Friedrich Merz, deklaroi se çdo plan paqeje për Ukrainën që prek “interesat dhe sovranitetin” evropian kërkon “pëlqimin” e kontinentit.
“Ne vazhdojmë të mbështesim Ukrainën: Ne kërkojmë një armëpushim sa më shpejt të jetë e mundur, një paqe të drejtë dhe të qëndrueshme për Ukrainën dhe siguri për Evropën. Çdo plan që prek interesat dhe sovranitetin evropian kërkon pëlqimin e Evropës. Evropa qëndron e vendosur dhe e bashkuar”, tha ai.
Ndërkaq presidenti francez, Emmanuel Macron, paralajmëroi se nuk mund të ketë kufizime për ushtrinë e Ukrainës, duke u kundërpërgjigjur propozimit amerikan që lejonte një forcë të kufizuar ushtarake ukrainase.
Pas takimit të sotëm virtual të koalicionit të vetëshpallur të të vullnetshëmve, Macron shtoi se vendet e BE-së shpresojnë të finalizojnë një zgjidhje për financimin e mbrojtjes së Ukrainës.
Për këtë të fundit ai iu referua aseteve të ngrira ruse në Evropë – një çështje e diskutueshme më parë për bllokun.
Muajin e kaluar, BE-ja miratoi paketën e fundit të sanksioneve, por nuk arriti një marrëveshje për përdorimin e aseteve të ngrira për të financuar një kredi për Ukrainën.
Në fjalën e tij, Macron tha gjithashtu se Ukrainës i duhet një paqe që është “serioze” dhe “respekton të drejtën ndërkombëtare”.
Kurse presidentja e Komisionit të BE-së, Ursula von der Leyen, tha se udhëheqësit evropianë, në telefonatën me Rubion, këmbëngulën se vazhdimi i presionit mbi Rusinë ishte e vetmja mënyrë për të arritur paqen.
“Meqenëse presioni mbetet e vetmja gjuhë ndaj së cilës përgjigjet Rusia, ne do të vazhdojmë ta rrisim atë derisa të ketë një gatishmëri të vërtetë për t’u angazhuar në një rrugë të besueshme drejt paqes”.
