Ambasadori i Mbretërisë së Bashkuar në OSBE, Neil Holland, në një mbledhje të mbajtur sot në Vjenë, ka folur për situatën e sigurisë dhe atë politike në Kosovë.
Holland ka përmendur zgjedhjet e mbajtura më 9 shkurt duke theksuar se Mbretëria e Bashkuar vazhdon t’ua nënvizojë bashkëbiseduesve në Kosovë nevojën urgjente për formimin e qeverisë së re.
Ambasadori britanik Holland gjithashtu ka thënë se shteti i tij ndan shqetësime të theksuar në raportin e Misionit të OSBE-së, për nivelin e tensioneve në komunat veriore gjatë periudhës së raportimit.
Ai ka thënë se Mbretëria e Bashkuar është veçanërisht e shqetësuar për natyrën e pakoordinuar të mbylljes së institucioneve dhe objekteve në veri të Kosovës, të cilat ofrojnë shërbime jetike për serbët e Kosovës dhe komunitetet e tjera jo-shumicë.
“Mbretëria e Bashkuar ndan shqetësimet e theksuara në raportin e Misionit mbi nivelin e tensioneve në katër komunat veriore gjatë periudhës së raportimit. Ne jemi veçanërisht të shqetësuar nga natyra e pakoordinuar e mbylljes së institucioneve dhe objekteve në veri të Kosovës, të cilat ofrojnë shërbime jetësore për serbët e Kosovës dhe komunitetet e tjera jo-shumicë. Mbretëria e Bashkuar do të vazhdojë të inkurajojë Qeverinë e Kosovës që të sigurojë që komunitetet jo-shumicë të mund të luajnë një rol të plotë dhe të barabartë në të ardhmen e vendit, dhe të mbështesë angazhimet e Kosovës si një shtet gjithëpërfshirës dhe shumetnik”, ka thënë ai.
Holland, gjithashtu ka folur edhe për sulmin e Banjskës dhe sulmet ndaj trupave të KFOR-it.
Ai i ka bërë thirrje Serbisë për të bashkëpunuar në përpjekjet për të mbajtur përgjegjës autorët dhe gjithashtu që të përmbush premtimin për të bashkëpunuar në hetimin për sulmin në Ibër-Lepenc.
“Mbretëria e Bashkuar gjithashtu nënvizon rëndësinë e sigurimit të drejtësisë dhe llogaridhënies për të gjitha aktet e dhunës. Ne vazhdojmë t’i bëjmë thirrje Serbisë të bashkëpunojë plotësisht në përpjekjet për të mbajtur para përgjegjësisë ata që janë përgjegjës për sulmet e vitit 2023 ndaj trupave të KFOR-it dhe në Banjska, dhe të përmbushë premtimin e saj për të bashkëpunuar në hetimin e sulmit në Kanalin Ibër-Lepenc”, ka deklaruar ai.
