Pas njohjes, Mbretëria e Bashkuar po ndjek një plan paqeje, e cila do të prezantohet në Asamblenë e Përgjithshme të OKB-së.
Sekretarja e Jashtme, Yvette Cooper pritet ta përdorë samitin për të adresuar vuajtjet e civilëve në Gazën e shkatërruar nga lufta dhe për të synuar forcimin e “konsensusit ndërkombëtar mbi rrugën tonë për paqe në Lindjen e Mesme”.
Ajo do të zhvillojë takime dypalëshe për të çuar përpara elementët e planit të paqes, duke përfshirë masat e sigurisë për të siguruar që Hamasi të mos ketë asnjë rol në qeverisjen e ardhshme të Gazës, sipas Ministrisë së Jashtme.
Kryeministri Sir Keir Starmer, i cili nuk do të jetë i pranishëm në samit, tha dje se Mbretëria e Bashkuar e njeh Palestinën si shtet të pavarur për të “ringjallur shpresën për paqe për palestinezët dhe izraelitët, dhe një zgjidhje me dy shtete”.
Ndërsa diplomacia zë vend qendror, një armëpushim në Gaza nuk duket aspak afër.
Një zëdhënës i ministrisë së shëndetësisë të drejtuar nga Hamasi tha se 70 persona u vranë dje në sulmet ajrore izraelite.
Dr. Khalil al-Daqran tha se 55 prej tyre ishin në Qytetin e Gazës, ku Izraeli po përqendron sulmet e tij në një përpjekje për të pushtuar qytetin që e quan një bastion të Hamasit.
“Ekipet tona nuk janë në gjendje të shpëtojnë martirët dhe të plagosurit nga rrënojat”, shtoi ai.
