Storm/formula1: Shefi i strategjisë së garave në Red Bull, Will Courtenay, ka vendosur të largohet nga skuadra pas 14 vitesh për t’iu bashkuar McLaren-it si drejtor sportiv. Ky është anëtari i tretë i menaxhmentit të lartë të Red Bull-it që largohet në pesë muajt e fundit, duke shënuar një zhvillim të rëndësishëm në procesin e ristrukturimit të McLaren-it.
Drejtori i ekipit të McLaren-it, Andrea Stella, ka vlerësuar përvojën dhe pasionin e Courtenay-t për motorsportin, duke e quajtur atë kandidatin ideal për të udhëhequr funksionin sportiv të skuadrës, në fazën e rëndësishme të garave për tituj dhe kampionate.
Courtenay do të raportojë te drejtori i garave, Randeep Singh, me synimin për të zgjeruar operacionet sportive të ekipit, ndërsa Red Bull ka konfirmuar se Courtenay do të vazhdojë të shërbejë deri në përfundim të kontratës në mes të vitit 2026. Sidoqoftë, zakonisht në raste të tilla, skuadrat hyjnë në negociata për të mundësuar një kalim më të hershëm.
Ky zhvillim është pjesë e një ristrukturimi të McLaren-it që ka filluar me largimin e ish-drejtorit teknik, James Key, në mars 2023, dhe nënshkrimin e Rob Marshall nga Red Bull si krye-dizajner në maj të po atij viti.
