Një pjesë e Prishtinës së Re ka mbi një orë që është në terr, shkaku i ndërprerjes së energjisë elektrike.
Banorët e kësaj lagje janë ankuar pasi në këto temperatura të ulëta që po mbizotërojnë këto ditë dhe në mungesë të ngrohjes nga Termokosi, ndërprerja e rrymës vetëm sa ka sjellë telashe për ta.
Ata janë ankuar se KEDS nuk ka dhënë asnjë njoftim se në këtë lagje do ketë ndërprerje të energjisë.
Një fakt i tillë vërtetohet edhe në njoftimin e KEDS për ditën e sotme.
Aty të gjitha njoftimet e publikuara janë për periudhën e paradites, por jo për të pasdites.
Ndërkohë, KESCO u ka nisur qytetarëve një njoftim për kursim të energjisë.
“Të nderuar konsumatorë. Sezoni i ftohtë ka nisur dhe konsumi i energjisë po arrin pikun e tij. Ju lutem i të mbani konsumin tuaj mujor nën 800kwh. Duke kursyer përfitoni fatura më të ulëta dhe ndihmoni funksionimin e qëndrueshëm të sistemit elektroenergjetik për të gjithë”, thuhet në njoftim.
Ndërprerje të energjisë është raportuar të ketë pasur në kryeqytet edhe gjatë mesditës.
