Selmans shpërthen kundër RTV Dukagjinit: “Lojë e ulët me imazh, për klikime të shfrenuara”
Çfarë nisi si një incident teknik në Prishtinë, tani është kthyer në një përplasje të paprecedentë ndërmjet Selmans Network dhe RTV Dukagjinit, me kërcënime me padi dhe akuza për pseudo-gazetari, shantazh publik dhe shkatërrim të imazhit.
Në qendër të zjarrit është një video e publikuar nga RTV Dukagjini, ku pa asnjë verifikim paraprak, pretendohej “vjedhja e rrethojave të rrugës” nga punëtorët e Selmans Network, të cilët në fakt, ishin duke kryer detyra zyrtare në bazë të një kontrate trevjeçare me Komunën e Prishtinës.
Pa e pyetur as Komunën, as Policinë dhe as kompaninë – madje duke pasur përpara edhe logot e automjeteve dhe numrat e tabelave të dukshëm – RTV Dukagjini publikoi videon, duke nisur një ortek dezinformimi. Për më keq, edhe pasi u dërguan prova dhe sqarime, videoja u rikthye me një titull të kamufluar: “Dyshohet për vjedhje të rrethojave”.
Në një reagim të gjatë dhe të pa kursyer, Selmans thotë se kërkesa miqësore për të larguar videon hasi në arrogancë zyrtare, me përgjigjen: “Nuk largohet – nëse ki me reagu, nisma reagimin”.
Kjo qasje – një përzierje e mendjemadhësisë së pavend me adoleshencë profesionale – e shtyu Selmans-in të paralajmërojë padi gjyqësore dhe ankesë në Komisionin e Pavarur për Media.
Në këtë “luftë të vjetër miqsh”, nuk ka mbetur më vend për keqkuptime:
Selmans akuzon RTV Dukagjinin për përdorimin e fakteve të manipuluara për të ndërtuar lajme bombastike që ushqejnë etjen për klikime të lira, ndërkohë që profesionalizmi dhe etika bien në greminë.
E vërteta e hidhur është kjo:
Një pjesë e madhe e mediave në Kosovë kanë hequr dorë nga standardet bazike të gazetarisë, duke e kthyer lajmin në armë personale dhe klikimin në qëllim vetëvrasës.
Në këtë rast, RTV Dukagjini, që dikur pretendonte të ishte shembull i profesionalizmit rajonal, ka zgjedhur të ulet në nivelin e pseudolajmit, duke shkelur mbi emrin dhe reputacionin e vet për të kapur ndonjë koment më shumë në rrjete sociale.
Në fund të ditës, paditë do të flasin në sallat e gjyqit. Por një gjë tashmë është e qartë: kjo përballje mes “miqve të vjetër” është shndërruar në një arenë ku përplasja është e pashmangshme – dhe nga kjo lojë e ndotur, askush nuk del i pastër.
