Agjencitë e inteligjencës botërore po kërkojnë prova për ekzistencën e Mojtaba Khameneit, ndërsa Presidenti Trump dhe zyrtarë të lartë sugjerojnë se ai mund të ketë vdekur ose është gjymtuar rëndë.
Që nga emërimi i tij si Lider Suprem më 9 mars, Mojtaba Khamenei nuk është shfaqur në asnjë video apo regjistrim audio, duke lënë CIA-n dhe agjencitë e tjera në dyshim nëse ai është vërtet gjallë. Mesazhi i tij i fundit për festën e Nevruzit ishte thjesht një tekst i shkruar, i cili u lexua në televizion nga një spiker lajmesh.
Sekretari i Mbrojtjes, Hegseth, ka deklaruar se lideri i ri mund të jetë plagosur rëndë dhe është “ndoshta i deformuar” fizikisht. Ndërkohë, zyrtarë izraelitë pohojnë për Axios se nuk ka asnjë dëshmi që urdhrat që vijnë nga Teherani po jepen vërtet prej tij, duke ngritur pikëpyetje se kush po e drejton realisht vendin.
Presidenti Donald Trump ka sugjeruar hapur se Mojtaba mund të mos jetë fare gjallë, ndërsa agjencitë e inteligjencës dëshmojnë për një krizë të thellë të komandës dhe kontrollit brenda shtetit iranian. Edhe pse nuk parashikohet një kolaps i menjëhershëm i regjimit, kjo paqartësi po trondit themelet e pushtetit në mes të luftës.
Kjo krizë lidershipi vjen në një kohë kur regjimi ka intensifikuar terrorin ndaj popullatës, siç dëshmohet nga ekzekutimi i fundit i 19-vjeçarit Sale Mohammadi. Kampioni i mundjes u var në litar për pjesëmarrje në protesta, një akt që shihet si tentativë për të fshehur dobësinë e një udhëheqjeje që mund të jetë vetëm një imazh i krijuar.
