Më 10 prill të vitit 1921 lindi në Kavajë dirigjenti dhe kompozitori i njohur Mustafa Krantja.
Shkollën e mesme e kreu në Tiranë, ndërsa studimet e larta i përfundoi në Akademinë e Arteve në Pragë, ku u njoh me repertorin klasik evropian dhe u formua si dirigjent profesionist.
Pas diplomimit u kthye në Shqipëri dhe në vitin 1951 themeloi Orkestrën Simfonike të Teatri i Operës dhe Baletit. Në vitin 1964 themeloi Konservatorin e Arteve (sot Universiteti i Arteve), duke hapur për herë të parë degën e dirigjimit në një institucion të lartë artistik shqiptar.
Si pedagog i dirigjimit ai edukoi breza të rinj, duke vendosur bazat e traditës së dirigjimit në muzikën klasike shqiptare.
Në karrierën e tij shumëvjeçare ai dirigjoi një numër të madh premierash të kompozitorëve shqiptarë dhe botërorë në të gjitha gjinitë, nga kënga deri tek opera e baleti. Ai dirigjoi operat e para shqiptare “Mrika” dhe “Skënderbeu”, si dhe baletin e parë shqiptar “Halili dhe Hajria”.
Mustafa Krantja ishte krijues i 20 veprave madhore muzikore, vokale e simfonike. Në shenjë respekti për punën e palodhur, angazhimin dhe përkushtimin e tij, ai është vlerësuar me çmime të shumta, ndër të cilat dekoratën ndërkombëtare “A. Dvořák”,(1975) të akorduar nga autoritetet muzikore çeke, dhe urdhrin “Nderi i Kombit”, i akorduar pas vdekje nga Presidenti i Republikës së Shqipërisë.
U nda nga jeta më 4 janar 2002, në Tiranë. /atsh
