Kanë filluar në Arabinë Saudite bisedimet midis zyrtarëve amerikanë dhe një delegacioni rus për të diskutuar një armëpushim të pjesshëm në luftë.
Grigory Karasin, një ish-diplomat që tani po kryeson Komitetin e Punëve të Jashtme të dhomës së lartë të parlamentit rus, do të përfaqësojë Rusinë gjatë bisedimeve së bashku me Sergei Beseda, këshilltar i drejtorit të Shërbimit Federal të Sigurisë.
Bisedimet në Riad vijnë pasi një delegacion ukrainas, i kryesuar nga ministri i Mbrojtjes Rustem Umerov, u takua me ekipin amerikan të dielën mbrëma.
Mike Waltz, këshilltari për sigurinë kombëtare të Shtëpisë së Bardhë, tha të dielën se delegacioni amerikan do të diskutonte një armëpushim në Detin e Zi dhe “vijën e kontrollit” midis Rusisë dhe Ukrainës, të cilën ai e përshkroi si “masa verifikimi, paqeruajtje, ngrirje të linjave ku ndodhen”.
Duke folur për CBS, ai shtoi se “masat e ndërtimit të besimit” po diskutoheshin, duke përfshirë kthimin e fëmijëve ukrainas të marrë nga Rusia.
Bisedimet midis negociatorëve rusë dhe amerikanë vijnë pas diskutimeve të veçanta në Arabinë Saudite midis ekipit amerikan dhe një delegacioni ukrainas.
Ministri i Mbrojtjes Rustem Umerov, i cili udhëhoqi ekipin ukrainas, i përshkroi bisedimet dje në mbrëmje si “produktive dhe të fokusuara”.
“Ne trajtuam pikat kyçe duke përfshirë energjinë”, shkroi ai në X.
Umerov tha se objektivi i presidentit Volodymyr Zelenskyy “është të sigurojë një paqe të drejtë dhe të qëndrueshme për vendin tonë dhe popullin tonë – dhe, si rrjedhojë, për të gjithë Evropën”.
“Ne po punojmë për ta bërë këtë qëllim realitet”, shtoi ai.
E derisa bisedimet vazhdojnë, në teren lufta nuk ndalet.
Zyrtarët ukrainas thanë se Rusia nisi një sulm ajror gjatë natës në Kiev për të tretën ditë radhazi, duke plagosur një person dhe duke dëmtuar disa shtëpi në rajonin përreth kryeqytetit ukrainas.
Një 37-vjeçar ka marrë plagë nga predha në pjesën e sipërme të trupit dhe kokës, tha guvernatori Mykola Kalashnyk në Telegram.
Ndërkohë në rajonin juglindor të Zaporizhzhia, një sulm rus mbrëmë plagosi një grua 54-vjeçare dhe dëmtoi xhamat e ndërtesave shumëkatëshe dhe banesore, sipas administratës rajonale.
Ministria ruse e Mbrojtjes tha se njësitë e mbrojtjes ajrore kanë kapur dhe shkatërruar 28 dronë ukrainas gjatë natës.
Në një postim në Telegram, ai tha se 12 drone u rrëzuan mbi rajonin kufitar Kursk. 12 të tjerë u shkatërruan në rajonin jugor të Rostovit.
Ministria shtoi se katër dronët e mbetur u rrëzuan mbi Krime, rajonin e Krasnodarit dhe ujërat e Detit Azov.
