Një kompani amerikane njoftoi se ka ndërtuar robotin e parë humanoid të gatshëm për konsumatorin, i cili mund t’i bëjë të gjitha llojet e punëve të shtëpisë, të tilla si palosja e rrobave të lara, organizimi i rafteve dhe rregullimi i hapësirave.
Roboti NEO me një klikim ose komandë gojore, do të bëhet një kujdestare personale që do të kryejë detyrat e shtëpisë.
Roboti fuqizohet nga një model i madh gjuhësor (LLM), baza e modeleve të inteligjencës artificiale që mëson dhe mban mend se cilat janë preferencat e përdoruesit dhe mund të japë sugjerime të informuara, si çka të gatuajë ose vendosjen e kujtesave për ditëlindje.
Kushdo që blen robotin NEO mund t’i mësojë atij çdo punë tjetër që dëshiron të bëhet.
1X Home Robots tha se roboti NEO është gjithashtu i pajisur me WiFi, Bluetooth dhe një “altoparlant me tre faza”, i cili u jep pronarëve një sistem argëtimi në shtëpi të lëvizshme.
“[Kompania jonë] e sjell idenë fantastiko-shkencore të robotëve nga ekrani i filmit në realitet, duke krijuar hapësirë që ne të shijojmë kohën tonë në shtëpi, në vend që të kthehemi në shtëpi vetëm për të bërë më shumë punë”, tha kompania amerikane.
Megjithatë, sipas The Wall Street Journaly, e cila e testoi robotin, ai mund të duhet të kontrollohet nga një njeri dhe një përfaqësues i kompanisë mund të duhet të shikojë në shtëpi përmes syve të robotit për të bërë punët e shtëpisë.
Drejtori ekzekutiv i kompanisë i tha gazetës se kompania ka nevojë për të dhënat e përdoruesve për të përmirësuar robotin.
Roboti është në gjendje të përdorë duar të ngjashme me ato të njeriut për të ngritur mbi 68 kilogramë dhe për të mbajtur 25 kilogramë ndërsa kryen detyrat e tij të përditshme.
Roboti NEO do të jetë i disponueshëm fillimisht në shtëpitë amerikane në vitin 2026 dhe do të zgjerohet në tregje të tjera deri në vitin 2027. Kushton 20,000 dollarë (17,060 euro) ose 499 dollarë në muaj (425.70 euro) përmes një abonimi.
Prezantimi i robotit NEO vjen menjëherë pasi një robot i ngjashëm u lançua më parë këtë muaj nga Figure AI, me robotin shtëpiak të quajtur Figure 03. Megjithatë, modeli i Figure AI nuk është ende i disponueshëm për shitje paraprake.
