Filmi One Battle After Another ka triumfuar në edicionin e sivjetmë të çmimeve BAFTA Awards, duke rrëmbyer çmimin kryesor për filmin më të mirë. Komedia e zezë me regji të Paul Thomas Anderson, që trajton historinë e persekutimit të ish-revolucionarëve nga supremacistët e bardhë në Shtetet e Bashkuara, ishte fituesja e madhe e mbrëmjes.
Përveç çmimit kryesor, Anderson u vlerësua edhe si regjisori më i mirë, duke lënë pas emra të njohur si Yorgos Lanthimos për “Bugonia”, Chloé Zhao për “Hamnet”, Josh Safdie për “Marty Supreme”, Joachim Trier për “Sentimental Value” dhe Ryan Coogler për “Sinners”.
Në kategorinë e aktorit më të mirë triumfoi aktori britanik Robert Aramayo për rolin në filmin I Swear, një dramë biografike me regji të Kirk Jones, e bazuar në historinë e vërtetë të një skocezi që jeton me sindromën Tourette. Ndërkohë, çmimi për aktoren më të mirë i takoi Jessie Buckley për interpretimin e saj në filmin Hamnet, duke konfirmuar pritshmëritë si favorite e kategorisë.
Në rolet mbështetëse u vlerësuan Sean Penn për paraqitjen e tij në “One Battle After Another” dhe Wunmi Mosaku për “Sinners”.
“Hamnet” u shpall filmi më i mirë britanik, ndërsa çmimi për filmin më të mirë në gjuhë të huaj i takoi produksionit norvegjez Sentimentality. Në kategorinë e animacionit fitoi Zootopia 2, ndërsa “Frankenstein” u vlerësua për dizajnin e kostumeve. Çmimin për efektet vizuale më të mira e fitoi Avatar: Fire and Ash, ndërsa dokumentari më i mirë u shpall Mr. Nobody Against Putin.
Çmimet BAFTA mbahen tradicionalisht para ceremonisë së Academy Awards, e cila këtë vit do të zhvillohet më 15 mars, dhe shpesh konsiderohen si një tregues i rëndësishëm për garën drejt “Oscar”.
