Mediat ndërkombëtare kanë raportuar se ushtria izraelite ka plagosur 20 kërkues ndihmash në Gaza, derisa ka vrarë 28 të tjerë në të gjithë Rripin e Gazës. Ndërkohë deri në orët e para të mbrëmjes, numri i të vrarëve shkoi në mbi 30.
Nga ana tjetër, presidenti francez Emmanuel Macron ka paralajmëruar se vendi i tij mund të “zbatojë sanksione” kundër izraelitëve nëse qeveria në Tel Aviv nuk i përgjigjet krizës humanitare në Gaza.
Duke folur gjatë një vizite në Singapor të premten, Macron tha se bashkësia ndërkombëtare nuk mund të qëndrojë pasive ndërsa palestinezët në Gaza përballen me një krizë urie që po thellohet.
Komentet rrisin më tej presionin ndërkombëtar mbi Izraelin, i cili ka bllokuar enklavën palestineze për gati tre muaj, me agjencitë e ndihmës që paralajmërojnë për zi buke.
“Bllokada humanitare po krijon një situatë të papërballueshme në terren”, tha Macron në një konferencë të përbashkët për shtyp së bashku me kryeministrin e Singaporit Lawrence Wong.
“Nëse nuk ka përgjigje në orët dhe ditët në vijim në përputhje me situatën humanitare, do të na duhet të ngurtësojmë qëndrimin tonë kolektiv”, shtoi ai, duke sugjeruar që Franca mund të shqyrtojë zbatimin e sanksioneve kundër kolonëve izraelitë.
Hamasi ka dalë me një deklaratë ku thuhet se po konsultohet me grupe dhe fraksione të tjera palestineze në terren në Gaza mbi një propozim për armëpushim të përkohshëm të paraqitur nga i dërguari i administratës Trump për Lindjen e Mesme, Steve Witkoff.
Deklarata vjen pasi një zyrtar nga grupi palestinez tha më parë se propozimi në formën e tij aktuale do të rezultonte vetëm në “vazhdimin e vrasjeve dhe urisë” në Gaza.
