Bashkimi Evropian thotë se Rusia përbën një kërcënim të drejtpërdrejtë për bllokun përmes akteve të sabotimit dhe sulmeve kibernetike, ndërsa shpenzimet e saj masive ushtarake sugjerojnë se Moska gjithashtu planifikon të përdorë forcat e armatosura diku tjetër në të ardhmen.
“Rusia është tashmë një kërcënim i drejtpërdrejtë për Bashkimin Evropian… Ky është një plan afatgjatë për një agresion afatgjatë. Nuk shpenzohen aq shumë për ushtrinë nëse nuk planifikohet ta përdoret”, u tha Kallas ligjvënësve të BE-së në Strasburg të Francës, ndërsa renditi një sërë shkeljesh të hapësirës ajrore ruse, ushtrime ushtarake provokuese dhe sulme ndaj rrjeteve energjetike, tubacioneve dhe kabllove nënujore.
Kallas vuri në dukje se Rusia tashmë po shpenzon më shumë për mbrojtje sesa 27 vendet e BE-së së bashku, dhe këtë vit do të investojë më shumë “në mbrojtje sesa kujdesi i saj shëndetësor, arsimi dhe politika sociale së bashku”.
Sekretari i Përgjithshëm i NATO-s, Mark Rutte, ka thënë se Rusia po prodhon po aq armë dhe municione në tre muaj sa prodhojnë 32 aleatët së bashku në një vit.
Ai beson se Rusia mund të jetë në gjendje të nisë një sulm ndaj një aleati të NATO-s deri në fund të dekadës.
Në Evropë po shtohet shqetësimi se Rusia mund të përpiqet të vërë në provë garancinë e sigurisë të Nenit 5 të NATO-s, premtimin se një sulm ndaj ndonjërit prej aleatëve do të përballet me një përgjigje kolektive nga të 32 vendet anëtare.
Në vitin 2021, aleatët e NATO-s pranuan se sulmet kibernetike të rëndësishme dhe kumulative, në rrethana të caktuara, mund të konsiderohen gjithashtu si një sulm i armatosur që mund t’i çojë ata në thirrjen e Nenit 5, por deri më tani nuk është ndërmarrë asnjë veprim.
