I dërguari i Bashkimit Evropian për dialogun Kosovë-Serbi, Mirosllav Lajçak, ka thënë se ndonëse s’ka pasur hapa pozitivë në rrugën drejt normalizimit të raporteve, është optimist se Kosova e Serbia kanë bërë përparime në disa çështje.
Lajçak ka shkruar në Facebook për takimin e 24 tetorit në Bruksel.
“Javën e kaluar, prita një raund tjetër të dialogut të lehtësuar nga BE në nivel të kryenegociatorëve, me fokus në avancimin e normalizimit të marrëdhënieve ndërmjet Kosovës dhe Serbisë, veçanërisht përmes zbatimit të Marrëveshjes së vitit 2023 për Rrugën e Normalizimit. Ndonëse nuk kemi bërë hapa përpara për këtë, unë jam optimist për disa përparime të arritura në disa çështje të tjera kyçe, të cilat do t’i ndjekim në javët në vijim.
Gjithashtu, pata rastin të takohem me Drejtorin e Sekretariatit të Komunitetit të Energjisë për të diskutuar bashkëpunimin energjetik në Ballkanin Perëndimor dhe rëndësinë e integrimit të tregut në BE mes kompleksiteteve në marrëdhëniet Kosovë-Serbi”, ka thënë zyrtari i BE-së.
