Partia Demokratike e Kosovës (PDK) ka lëshuar seancën plenare të Kuvendit të Kosovës, pasi propozimi i tyre që rezoluta për mbrojtjen e viktimave të luftës të vendoset si pikë e parë e rendit të ditës, nuk u miratua.
Ky veprim u paralajmërua nga deputetja e kësaj partie, Vlora Çitaku, pas një debati me kryetaren e Kuvendit, Albulena Haxhiu. Ndonëse kryeparlamentarja Haxhiu përmendi nevojën për diskutime mes grupeve parlamentare, Çitaku theksoi se PDK-ja është e gatshme për takime, por jo për kompromise që prekin thelbin e rezolutës.
Sipas Çitakut, kjo nismë është më e rëndësishme se çdo marrëveshje ndërkombëtare që ishte paraparë për votim.
“Kryetare, grupet parlamentare dhe të gjithë deputetët e kanë pranuar tekstin e rezolutës dje; ka pasur kohë të mjaftueshme që grupet të japin vërejtjet e tyre. Megjithatë, ne jemi të gatshëm të ulemi bashkë, sepse për ne, dhe për secilin deputet, nuk ka asnjë çështje tjetër më të rëndësishme se trajtimi i kësaj rezolute dhe votimi i saj në unanimitet”, deklaroi ajo.
„Më e rëndësishme se marrëveshjet ndërkombëtare“ Çitaku i kujtoi kryetares Haxhiu se opozita kishte dhënë votat për marrëveshjet ndërkombëtare, por mbrojtja e të vërtetës historike mbetet prioriteti kryesor.
„Jemi të gatshëm të takohemi, por nuk jemi të gatshëm të bëjmë kompromis. Ua dhamë votat për marrëveshjet ndërkombëtare, por kjo rezolutë në mbrojtje të së vërtetës historike dhe të viktimave është më e rëndësishme se çdo marrëveshje tjetër. Ju lutem kryetare, punë tjetër ne nuk kemi; rrijmë këtu edhe pesë orë, ta kryejmë sot dhe ta kryejmë si pikë të parë të rendit të ditës“, shtoi deputetja e PDK-së.
Pas largimit të grupit parlamentar të PDK-së, i vetmi që qëndroi në sallën e seancave nga radhët e këtij subjekti ishte deputeti Nait Hasani.
