Mitrovicë, 3 Tetor 2025 – Kandidati i Lëvizjes Vetëvendosje–Guxo për kryetar të Mitrovicës së Jugut, Faton Peci, ka publikuar një fotografi bashkë me kryeministrin në detyrë, Albin Kurti, dhe ministren e Punëve të Jashtme në detyrë, Donika Gërvalla-Schwarz, e cila është edhe bashkëkryetare e subjektit politik Guxo.
Në mbishkrimin e fotos, Peci ka përdorur shprehjen: “Sinergjia që sjell energji”, duke nënkuptuar përpjekjet për të treguar unitetin brenda koalicionit VV–Guxo në prag të zgjedhjeve të 12 tetorit.
Fotografia është pritur me interes në opinion, pasi shihet si një sinjal i qartë për bashkëpunimin e ngushtë të strukturave qendrore të partisë në mbështetje të kandidaturës së Pecit për Mitrovicën e Jugut.
Zgjedhjet lokale pritet të shihen si një test i rëndësishëm për forcat politike në terren, ndërsa kandidatët po përpiqen të konsolidojnë bazën e tyre dhe të tërheqin sa më shumë votues në ditët e fundit të fushatës.
