Një operacion i madh kërkim-shpëtimi po vazhdon në Teksas, pasi përmbytjet e menjëhershme mbytën të paktën 24 persona dhe shumë vajza nga një kamp veror i krishterë mbeten të zhdukura.
Lumi Guadalupe u rrit 7.9 metra në më pak se një orë dhe përmbytjet që pasuan rrënuan shtëpi të lëvizshme, automjete dhe kabina pushimesh ku njerëzit po kalonin fundjavën e 4 korrikut.
Ekipet e shpëtimit janë ende në kërkim të 25 fëmijëve, të cilët ishin midis 750 vajzave që ndiqnin kampin Mystic, pak jashtë qytetit të Kerrville, 104 km në veriperëndim të San Antonios.
Gjendje e jashtëzakonshme është shpallur në disa qarqe ku disa rrugë janë përmbytur dhe linjat telefonike janë ndërprerë.
Presidenti i SHBA-së, Donald Trump, e quajti tragjedinë “tronditëse” dhe “të tmerrshme”, ndërsa Shtëpia e Bardhë premtoi ndihmë shtesë.
“Brenda 45 minutash, niveli i lumit Guadalupe u rrit 26 metra dhe kjo ishte një përmbytje shkatërruese, duke marrë prona dhe për fat të keq jetë”, deklaroi zëvendësguvernatori i Teksasit, Dan Patrick.
Ai gjithashtu i informoi prindërit se nëse nuk janë kontaktuar, fëmija i tyre llogaritet.
“Kjo nuk do të thotë që [fëmijët e zhdukur] janë zhdukur. Ata mund të jenë jashtë komunikimit”, shtoi Patrick.
Zyrtarët thanë se operacionet e kërkim-shpëtimit, që përfshijnë helikopterë, dronë dhe anije, do të vazhdojnë derisa të gjenden të gjithë të përfshirët.
Kampi tha se nuk kanë energji elektrike, ujë dhe Wi-Fi, duke shtuar se “autostrada është rrënuar, kështu që po përpiqemi të marrim më shumë ndihmë”.
Të premten në mëngjes, përmbytjet e menjëhershme në shtet shkaktuan shpallje katastrofe për rajonet Hill Country dhe Concho Valley.
Zyrtari më i lartë i Qarkut Kerr, gjykatësi Rob Kelly, u pyet gjatë një konference për shtyp pse kampet përgjatë lumit Guadalupe nuk u evakuuan paraprakisht.
“Nuk e dinim që kjo përmbytje po vinte. Jini të sigurt, askush nuk e dinte që ky lloj përmbytjeje po vinte”, tha Kelly.
Kelly shtoi se ajo që ndodhi të premten i tejkaloi shumë përmbytjet në vitin 1987, të cilat vranë 10 adoleshentë në një autobus kampi kishtar pranë qytetit Comfort, në jug të Qarkut Kerr.
Divizioni i Menaxhimit të Emergjencave në Teksas pati disa takime të enjten për t’u përgatitur, por zyrtarët thanë se Shërbimi Kombëtar i Motit “nuk parashikoi sasinë e shiut”.
Vlerësimet fillestare ishin deri në 20 cm shi.
Zyra e Sherifit të Qarkut Kerr u tha banorëve pranë përrenjve dhe lumit Guadalupe të zhvendosen në zona më të larta.
Ndërkohë, senatori republikan i Teksasit, Ted Cruz, tha se Presidenti Trump kishte “angazhuar çdo gjë që i duhej Teksasit”.
