Permbytjet godasin Europën Qendrore – qyteti polak Nysa në rrezik, urdhërohet evakuimi i banorëve
Qyteti polak Nysa, me një popullsi prej 44,000 banorësh, është urdhëruar të evakuohet plotësisht për shkak të përmbytjeve të mëdha që kanë goditur Europën Qendrore. Kryetari i komunës së Nysës, Kordian Kolbiarz, bëri thirrje për evakuim të menjëhershëm, duke paralajmëruar rrezikun e prishjes së një argjinature që mund të shkaktojë një valë të fuqishme uji nga një liqen pranë qytetit.
“Evakuoni veten, të dashurit tuaj dhe gjërat me vlerë. Ngjituni në katet më të larta të ndërtesave sepse vala mund të arrijë disa metra lartësi, duke përmbytur të gjithë qytetin,” deklaroi kryetari Kolbiarz.
Numri i viktimave nga përmbytjet ka arritur në të paktën 16, përfshirë 7 të vdekur në Rumani. Viktima janë regjistruar gjithashtu në Austri, Republikën Çeke dhe Poloni.
Kryeministri polak, Donald Tusk, njoftoi se një miliard zlotë (rreth 197 milionë paund) do të ndahen për viktimat e përmbytjeve, ndërsa Polonia gjithashtu do të kërkojë fonde ndihme nga BE-ja. Qeveria polake ka shpallur gjendjen e jashtëzakonshme natyrore në disa rajone.
Ndërkohë, Hungaria dhe Sllovakia po përgatiten për përmbytje të tjera, me lumin Danub që ka tejkaluar nivelin e ujit në disa qytete, përfshirë kryeqytetin hungarez, Budapest. Banorëve të Budapestit u janë shpërndarë miliona thasë rëre për mbrojtje ndaj përmbytjeve. Në disa vende, hekurudhat dhe rrugët janë bllokuar plotësisht.
by: Storm-rks + mediat evropiane
