Personazhi aq i dashur i Pipi Çorapegjatës këtë vit festoi 80-vjetorin, ndërkohë që është përkthyer në 80 gjuhë të botës dhe është transformuar në sa e sa filma.
Që prej vitit 1945, personazhi i autores suedeze Astrid Lindgren, (në origjinal, Pippi Långstrump), ka frymëzuar fëmijët në të gjithë botën.
Këtë përvjetor, stafi i Ambasadës Suedeze në Tiranë e ka festuar këndshëm duke shpërndarë në rrjetet sociale fotot e tyre me parukën e famshme kuqalashe të Pipit.
Krijimi i Pipi Çorapegjatës filloi kur vajza e shkrimtares Astrid Lindgren, Karin, ishte e sëmurë në shtrat dhe i kërkoi nënës së saj t’i tregonte një histori. Pikërisht atëherë Lindgren krijoi personazhin e një supervajzë që u bë një ikonë ndërkombëtare.
“Meqenëse emri ishte i jashtëzakonshëm, duhej të ishte një vajzë e jashtëzakonshme”, ka thënë Lindgren.
Në mesazhin që Ambasada Suedeze shpërndau me këtë rast, thuhet se, Pipi nuk është vetëm vajza më e fortë në botë, ajo është edhe simbol i lirisë, forcës, mirësisë, guximit dhe drejtësisë. Ajo mbron të dobëtit dhe të shtypurit, duke na treguar se ne kemi mundësinë të zgjedhim të ndihmojmë njëri-tjetrin dhe ta bëjmë botën pak më të mirë e pak më të drejtë.
Pipi Çorapegjata e pa dritën e botimit më 26 nëntor 1945 dhe për këtë përvjetor të 80-të janë mbajtur festime dhe aktivitete gjatë gjithë vitit 2025.
