Qendra për Hapje dhe Dialog (COD) organizoi promovimin e librit më të ri të Roland Qafokut, “11 Presidentët (1925-2025)”.
Gazetari e studiuesi Roland Qafoku sjell 1 shekull histori, si një udhëtim përmes figurave që kanë mbajtur postin më të lartë të shtetit shqiptar.
“11 Presidentët”, botuar nga UET Press, u prezantua përpara një publiku studentësh, gazetarësh e studiuesish, miq të autorit etj.
Roland Qafoku falenderoi COD-in për organizimin e bisedës letrare e në mënyrë të veçantë dy pjesëtarët e panelit, Nevila Nika dhe Niko Kotherja. Ai tha se edhe ky libër është në natyrën e librave të tij. Më herët ai ka botuar librin “Historia e 33 Kryeministrave të Shqipërisë. Nga Ismail Qemali te Edi Rama”.
“11 Presidentët” botohet në 100-vjetorin e Presidencës së parë të vendit. Nëpërmjet një stili më të thjeshtë e të qartë për lexuesin, libri vjen me qëllimin për të kuptuar më mirë të shkuarën, për të reflektuar mbi të tashmen dhe për të ndërtuar të ardhmen. /atsh
