MOSKË: – Ndërsa vlerësimet e inteligjencës së NATO-s dhe Shërbimit Federal të Inteligjencës Gjermane (BND) e shohin vitin 2029 si pragun kur Rusia do të jetë gati për një sulm konvencional , Moska po përshpejton përdorimin e teknologjive “asimetrike”. Një hulumtim i ri zbulon projektin e koduar PJN-1, i cili shndërron pëllumbat e gjallë në mjete fluturuese të telekomanduara përmes implanteve në tru.
Teknologjia PJN-1: Pëllumbat si “Spiunë të Padetektueshëm” Startup-i neuroteknologjik “Nairi Group” (Neiry), me bazë në Moskë, ka kryer testet e para ku zogjve u implantohen elektroda në kafkë, të cilat stimulojnë motivimin e tyre për të fluturuar sipas komandave të operatorit në distancë. Këta “bio-dronë” mbajnë çanta shpine me panele diellore, GPS dhe kamera në gjoks, duke udhëtuar deri në 480 kilometra në ditë.
Ky zhvillim targeton direkt një dobësi të NATO-s: pamundësinë e radarëve aktualë për të dalluar dronët e vegjël nga zogjtë biologjikë, duke lejuar depërtimin e padetektueshëm pas vijave të armikut.
Rreziqet Biokimike dhe Lidhjet me Kremlinin Ekspertët e mbrojtjes, përfshirë James Giordano nga Departamenti i Mbrojtjes i SHBA-së, paralajmërojnë se këta bio-dronë mund të shërbejnë si transportues për armë biokimike, duke përhapur agjentë patogjenë në qendra civile pa u vërejtur. Projekti PJN-1 raportohet se financohet nga rrethi i ngushtë i Vladimir Putinit dhe bashkëpunon me institutin kërkimor të drejtuar nga vajza e tij, Katerina Tikhonova.
Analiza e ILC: Çfarë do të thotë kjo për Kosovën? Instituti për Lidership Civil (ILC) vlerëson se ky zhvillim është pjesë e “Fazës Zero“ të luftës hibride—një fazë emergjence që ka filluar tashmë dhe synon sabotimin e infrastrukturës kritike.
-
Targetimi i Energjisë: Pëllumbat kiborgë mund të përdoren për të vëzhguar ose dëmtuar nyjet e ndjeshme të rrjetit energjetik të Kosovës, i cili është identifikuar si prioritet i sigurisë kombëtare.
-
Veprimet në Veri: Përdorimi i teknologjive të tilla që ofrojnë “mohueshmëri të lartë” (high deniability) mund të shfrytëzohet nga proksit rusë në rajon për të krijuar incidente pa lënë gjurmë teknologjike.
Rekomandimet e ILC: Në dritën e këtyre kërcënimeve, ILC rekomandon që Kosova të përshpejtojë miratimin e një Doktrine Kombëtare për Kërcënimet Hibride. Kjo doktrinë duhet të integrojë mbrojtjen civile me teknologjitë e avancuara të detektimit, duke siguruar që mbrojtja e infrastrukturës kritike të jetë prioritet absolut përpara vitit 2029.
