Pse duhet të mbështetet “Shteti Sovran i Urdhrit Bektashi” dhe si duhet të kuptohet krijimi i tij?
- Bektashizmi, si një rrugë mistike e Islamit, e ka zanafillën shumë vite përpara ardhjes së administratës Osmane në Ballkan. Sipas të dhënave historike, dishepujt Bektashinj kanë shtruar rrugën shpirtërore për përhapjen e fesë islame në Ballkan dhe kanë kontribuar në ardhjen e pushtetit administrativ të Perandorisë Osmane.
- Qendra Botërore e Bektashinjve ndodhet në Tiranë, gjë që lehtëson krijimin e këtij mini-shteti brenda territorit të Tiranës (e ngjashme me Vatikanin si qendër botërore e fesë së krishterë), i cili do të ketë një formë qeverisjeje teokratike. Në këtë formë, pushteti është i përqendruar në duart e klerit, si në kuptimin fetar, ashtu edhe politik.
- Në kuadrin ligjor që do ta udhëheqë këtë entitet, duhet të përcaktohet mënyra e marrjes së shtetësisë, e cila do t’u takojë ekskluzivisht vetëm klerit qeverisës dhe administratës zyrtare.
- Vlen të theksohet se Vatikani është një entitet sovran në të drejtën ndërkombëtare, i cili ruan pavarësinë materiale, diplomatike dhe shpirtërore të këtij entiteti.
- Në mënyrë të ngjashme me Vatikanin, ky entitet sovran do të luajë një rol të rëndësishëm në forcimin e paqes ndërfetare në botë, si dhe do të transmetojë përvojën shekullore të bashkëjetesës paqësore midis komuniteteve fetare në Shqipëri (vendet e banuara me shqiptarë).
- Krijimi i Shtetit Sovran të Urdhrit Bektashi nuk duhet të kuptohet si një luftë kundër ndonjë komuniteti tjetër në vend, veçanërisht kundër Bashkësisë Islame, e cila përfaqëson linjën zyrtare (por jo shpirtërore) të myslimanëve.
- Bektashinjtë e Shqipërisë, por edhe tarikatet e tjera në trojet shqiptare, gëzojnë dy tipare që bien në sy: tolerancën me të cilën i shohin besimet dhe organizimet e tjera, si dhe vendosjen e dashurisë për atdheun mbi gjithçka. “Pa atdhe, nuk ka fe.”
- Krijimi i këtij entiteti sovran do të mundësojë edhe krijimin e një trupe diplomatike shtesë, e cila do të avokojë në arenën ndërkombëtare për çështjet shqiptare, si në aspektin politik, diplomatik dhe kulturor, por edhe për të prezantuar platformën e tolerancës ndërfetare shqiptare.
- Duhet kujtuar se themeluesi i shtetit shqiptar, Ismail Qemali, i përkiste këtij komuniteti, ashtu si edhe Naim e Sami Frashëri, dhe një varg figurash të rëndësishme politike dhe kulturore.
- Gjithashtu, është një presion i madh për të kundërshtuar përforcimin e rrymave fetare ekstreme që janë prezente në rajonin tonë dhe që janë antagoniste ndaj traditës shekullore të praktikimit të fesë islame në vendet e banuara me shqiptarë / Hysen Beqa
Ky shkrim përfaqëson pikëpamjet e autorit pa ndonjë ndërhyrje editoriale nga storm-rks.com.
