Ministri rus i Transportit gjendet i vdekur me plagë nga armë zjarri ‘në Tesla-n e tij’, vetëm pak orë pasi u shkarkua nga Putini
Ministri i Transportit i Rusisë është gjetur i vdekur me një plagë nga arma e zjarrit, vetëm pak orë pasi u shkarkua nga presidenti Vladimir Putin.
Një dekret presidencial i publikuar më herët të hënën nuk dha asnjë arsye për shkarkimin e Roman Starovoit, i cili kishte vetëm një vit në detyrë.
Megjithatë, analistët politikë nuk vonuan të përmendnin mundësinë që shkarkimi i tij të kishte lidhje me një hetim për korrupsion në rajonin që dikur e kishte qeverisur. Një burim nga industria e transportit i tha agjencisë Reuters se pozita e Starovoit kishte qenë në pikëpyetje për muaj të tërë për shkak të një skandali korrupsioni që lidhej me fondet e destinuara për forcimin e kufirit të Rusisë me Ukrainën në rajonin e Kurskut.
Rrethanat e vdekjes së 53-vjeçarit mbeten të paqarta, ndërsa Komiteti Hetimor i Rusisë tha se po punon për të përcaktuar saktësisht se çfarë ka ndodhur.
Burime nga organet e rendit thanë se në veturën Tesla, pranë trupit të pajetë të Starovoit, ishte gjetur një pistoletë që i përkiste atij. Disa media ruse, megjithatë, raportojnë se ai ishte gjetur në një shkurre pranë parkingut. Fotografi nga vendi i ngjarjes tregojnë Tesla-n e zezë në një parking, ndërsa portali lokal Mash raportoi se ishte e dashura e tij 25-vjeçare, Polina Korneev, ajo që identifikoi trupin.
Para se të emërohej ministër i Transportit në maj 2024, Starovoit kishte qenë për gati pesë vjet guvernator i rajonit të Kurskut.
Tre muaj pas emërimit të tij si ministër, trupat ukrainase kaluan kufirin në Kursk, në atë që ishte ndërhyrja më e madhe e huaj në territorin rus që nga Lufta e Dytë Botërore. Ato u zmbrapsën vetëm në fillim të këtij viti pas luftimeve të ashpra dhe shkatërrimeve të mëdha.
Në prill të këtij viti, pasardhësi i tij si guvernator, Aleksei Smirnov, u akuzua për përvetësim të fondeve të destinuara për qëllime mbrojtëse, mes pretendimeve se paratë për mbrojtjen e kufirit ishin vjedhur, duke e lënë Kurskun më të ekspozuar ndaj sulmeve ukrainase.
I pyetur të hënën nga gazetarët nëse shkarkimi nënkuptonte humbjen e besimit të Putinit ndaj Starovoit për çështjen e Kurskut, zëdhënësi i Kremlinit Dmitry Peskov tha: “Humbja e besimit përmendet vetëm kur ka humbje besimi. Nuk ka formulim të tillë në dekretin (e Kremlinit).”
Shkarkimi i Starovoit ndodh në një periudhë sfiduese për sektorin e transportit në Rusi, ndërsa lufta në Ukrainë po hyn në vitin e katërt. Sektori i aviacionit në Rusi po përballet me mungesë të pjesëve të këmbimit, ndërsa Hekurudhat Ruse, punëdhënësi më i madh në vend, po përballet me kosto të larta të interesit, për shkak të normave të larta që janë vendosur për të frenuar inflacionin e nxitur nga lufta.
Kremlini njoftoi se Andrei Nikitin, ish-guvernator i rajonit të Novgorodit, është emëruar ministër i përkohshëm i Transportit dhe publikoi fotografi të tij duke shtrënguar duart me Putinin në Kremlin.
I pyetur për emërimin e shpejtë të Nikitinit, Peskov tha: “Aktualisht, sipas mendimit të presidentit, cilësitë profesionale dhe përvoja e Andrei Nikitinit do të ndihmojnë më së miri në përmbushjen e detyrave të këtij institucioni, që presidenti e ka quajtur jashtëzakonisht të rëndësishëm.”
Dy burime nga industria e transportit thanë se planet për të zëvendësuar Starovoit me Nikitinin kishin nisur që para Forumit Ekonomik Ndërkombëtar të muajit të kaluar në Shën Petersburg. Ministria e Transportit nuk komentoi të hënën.
Gjatë takimit me Putinin, Nikitin foli për punën në digjitalizimin e industrisë së transportit në Rusi për të zvogëluar ngërçet në dërgesat e mallrave dhe për të lehtësuar qarkullimin ndërkufitar.
Kjo ndodh vetëm disa ditë pasi një tjetër oligark rus i sektorit të naftës vdiq pasi ra në mënyrë misterioze nga një lartësi prej 55 metrash në shtëpinë e tij luksoze në Moskë.
Trupi i Andrey Badalov, 62 vjeç, u gjet të premten në mëngjes në fund të një ndërtese luksoze shumëkatëshe në lagjen elitare Rublevskoye në Moskë. Badalov ishte nënkryetar i monopolit shtetëror të tubacioneve të naftës, Transneft. Ai raportohet se jetonte në katin e 10-të të godinës, por kishte rënë nga kati i 17-të, sipas mediave lokale.
Një burim tha se “shkaku paraprak” i vdekjes është “vetëvrasja”, pasi hetuesit thuhet se gjetën një letër që Badalov ia kishte lënë gruas së tij. Ai ishte emëruar nënkryetar në vitin 2021, në një “periudhë të ndërlikuar dhe të tensionuar”, dhe ishte vlerësuar për ndihmën e tij në tejkalimin e sfidave të sanksioneve perëndimore.
Më parë kishte punuar në Institutin Kërkimor Shtetëror Voskhod.
Ndërkohë, Ravil Maganov, një tjetër oligark i lidhur me kompaninë Lukoil, vdiq në shtator 2022 pasi ra nga dritarja e Spitalit Klinik Qendror të Moskës, i njohur edhe si “Klinika e Kremlinit”. Mediat shtetërore ruse e cilësuan vdekjen si vetëvrasje, por burime të hetuesisë thanë se nuk kishte asnjë letër lamtumire dhe se nuk kishte kamera sigurie në pjesën e ndërtesës ku ndodhi rënia.
