Gjatë një sesioni pyetje-përgjigje në eventin kryesor të investimeve të Rusisë në Shën Petersburg, udhëheqësi i Kremlinit u pyet se cili ishte qëllimi i tij përfundimtar në konflikt.
“E kam thënë shumë herë se i konsideroj popullin rus dhe atë ukrainas si një komb të vetëm. Në këtë kuptim, e gjithë Ukraina është e jona”.
Përgjigja mori duartrokitje të zjarrta nga një auditor plot me politikanë dhe figura biznesi servilë.
“Ekziston një rregull i vjetër”, tha ai. “Ku shkel këmba e një ushtari rus, është e jona”.
Komentet erdhën si surprizë sepse janë në kontrast të thellë me retorikën e fundit të Kremlinit.
Që kur Donald Trump filloi përpjekjet e tij për një marrëveshje paqeje, Moska ka miratuar një ton më të butë, më pajtues – në një përpjekje të dukshme për t’i treguar Uashingtonit se është i interesuar për një zgjidhje.
Por këtu nuk kishte asnjë lloj gjuhe të tillë. Ndhodhi krejt e kundërta.
Presidenti rus madje, për herë të parë në muaj të tërë, kërcënoi me një sulm bërthamor ndaj Ukrainës.
I pyetur se si do të reagonte Moska nëse Kievi do të përdorte një bombë të ndyrë kundër forcave ruse, ai premtoi pasoja “katastrofike” për armikun e tij.
“Ky do të ishte një gabim kolosal nga ana e atyre që ne i quajmë neonazistë në territorin e Ukrainës së sotme”, tha ai. “Mund të jetë gabimi i tyre i fundit”.
“Ne gjithmonë përgjigjemi dhe përgjigjemi me të njëjtën monedhë. Prandaj, përgjigjja jonë do të jetë shumë e ashpër”.
Kërcitja e shpatave bërthamore e Kremlinit ishte një tipar pothuajse i përjavshëm gjatë ditëve të fundit të administratës Biden, por shpatat u qetësuan kur zoti Trump erdhi në pushtet.
Por tani, krejt papritur, ai është rikthyer tek ajo.
Duket si një mesazh shumë i qëllimshëm nga Vladimir Putini se, pavarësisht bisedimeve të paqes, Rusia nuk ka ndërmend të tërhiqet, as në fushën e betejës dhe as në tryezën e negociatave.
