Kryeministri i Shqipërisë, Edi Rama, ka reaguar për shpërthimin e mbrëmshëm në Zubin Potok, në Veri të Kosovës.
Ai këtë akt e ka vlerësuar si krim të rëndë, i cili jo vetëm që cenon jetën e qytetarëve të Kosovës, por godet procesin e normalizimit të marrëdhënieve në rajonin tonë, ku të gjitha shtetet janë të përfshira në rrugën e integrimit në BE.
Rama, përmes platformës “X”, ka shkruar se ky akt kriminal duhet zbardhur e ndëshkuar sa më parë me mbështetjen e partnerëve ndërkombëtarë.
“Ndërkohë Bashkimi Evropian duhet të heqë menjëherë sanksionet e mbetura ndaj Kosovës dhe të riangazhohet në një format të ri dialogu për normalizim mes Kosovës dhe Serbisë”, ka shkruar Rama.
Tutje, ai vlerëson se formati ekzistues ka dështuar të prodhojë rezultatet e dëshiruara dhe është koha që çështjet e dialogut të kalojnë përmes marrëdhënieve bilaterale të BE-së me Kosovën apo Serbinë, si dy shtete njësoj të pavarura prej njëra-tjetrës.
Rama më tej shtoi se fati evropian i secilit shtet s’mund të varet nga dëshirat a mosdëshirat e shtetit tjetër; ashtu sikundër fati evropian i krejt rajonit s’mund të varet nga mosnjohja e Kosovës nga Serbia apo 5 shtete anëtare të BE-së.
