Sot në Gjykatën Themelore të Prishtinës u mbajt një ndër seancat më të rëndësishme në rastin e njohur si “Veteranët”, ku disa zyrtarë të lartë përballen me akuza për përfshirje në skandalin e listave të fryra të veteranëve të luftës.
Seanca e sotme shënoi fazën përfundimtare të procesit, me palët që dhanë fjalët përmbyllëse para se trupi gjykues të tërhiqet për marrjen e vendimit. Sipas burimeve gjyqësore, shpallja e aktgjykimit pritet të ndodhë brenda tre ditësh.
Pas përfundimit të seancës, avokati Eset Berisha – mbrojtës i ish-komandantit të Zonës së Pashtrikut, Sadik Halitjaha – reagoi duke e cilësuar procesin si një “goditje të rëndë ndaj luftës çlirimtare”.
“Sot përfundoi një proces gjyqësor kundër anëtarëve të Komisionit Qeveritar për Verifikimin e Statusit të Veteranit të UÇK-së. Ky proces, në vend që të ndëshkojë individët me informacione të rreme, ka vënë në shënjestër vetë komisionin, edhe pse vendimin përfundimtar e kishte marrë Qeveria,” deklaroi Berisha.
Ai kritikoi qasjen e prokurorisë, duke thënë se ajo ka synuar të minimizojë meritat e luftëtarëve dhe ka ngritur akuza për mospërmbushje të detyrave që, sipas tij, ishin kompetencë e vetë prokurorisë.
Sipas Berishës, rasti është instrumentalizuar për të dëmtuar figurën e luftëtarëve të lirisë dhe për të vënë në pikëpyetje legjitimitetin e luftës çlirimtare.
Gjykata pritet të japë verdiktin për këtë çështje të ndjeshme brenda pak ditësh, me interes të lartë publik dhe ndikim të thellë në narrativën e pasluftës në Kosovë.
