Deputetja e Kuvendit të Kosovës nga komuniteti boshnjak, Emilja Rexhepi, ka folur rreth votës së saj për kryetare të Kuvendit.
Rexhepi, ka thënë se ajo e di që vetëm Albulena Haxhiu, është kandidate për kryetare të Kuvendit dhe nuk ka informacion nëse për këtë pozitë mund të jetë edhe kreu i NISMA-s, Fatmir Limaj.
“Unë e di që kandidati është LVV Albulena, por nuk e di se çfarë thuhet dhe kush e thotë, nuk kam informacion”, tha ajo.
E pyetur se a do ta votonte Limajn për këtë pozitë, Rexhepi ka thënë se LVV si parti fituese do të duhej ta propozonte njeriun e vetë nga radhët e saj.
“Kjo është një histori tjetër, mendoj se LVV-ja si partia më e fortë politike në parlament me 48 deputetë ka të drejtë të propozojë njeriun e vet”, u shpreh ajo, për frontonline.
Ajo deklaroi se mund edhe të japin propozimin e tyre për kryetar të Kuvendit.
“Nuk e di, do të shohim. Ne si grup multietnik prej 8 deputetësh që mbështesim qeverinë e Albin Kurtit, ndoshta mund të japim edhe propozimin tonë. Tani për tani votojmë për Albulenën, ajo është e vetmja kandidate”, tha Rexhepi.
